Joljúk pen qol júgin alyp júrý normalary boıynsha suraqtar jolaýshylar arasynda erekshe ózekti.
Osyǵan baılanysty «Qazaqstannyń avıasııa ákimshiligi» AQ jolaýshylarǵa arnalǵan jıyntyq aqparatty jáne áýe kóliginde júk alyp júrý qaǵıdalary boıynsha jalpy usynymdardy jarııalady.
Qazaqstan Respýblıkasynyń áýe keńistigin paıdalaný jáne avıasııa qyzmeti týraly Zańnyń 76-babynyń 1, 2-tarmaqtaryna sáıkes jolaýshylardy jáne júkterdi kommersııalyq áýemen tasymaldaý áýe bıleti negizinde júzege asyrylady.
Bagajdy tirkegennen keıin avıakompanııa onyń saqtalýyna jaýap beredi. Jolaýshyǵa joljúk nómiri bar bırkanyń úzbeli talonyn joljúk jetkizý beketinde alynǵanǵa deıin saqtaý kerek.
Joljúk keshiktirilgen, jetispegen, búlingen nemese joǵalǵan jaǵdaılarda, sondaı-aq bagaj túbirtegi men joljúk nómiri bar bırkanyń úzbeli talonyn kórsetpeı joljúk berilgen jaǵdaıda tasymaldaý kezinde aqaýlyq týraly akt toltyrylady.
Múmkindigi shekteýli adamdar men júrip-turýy shekteýli toptar qataryndaǵy jolaýshylar jeke paıdalanýǵa arnalǵan zembilderdi jáne kreslo-arbany ózimen birge joljúk retinde qosymsha tegin alyp júre alady.
«Ishki reısterde joljúkti tasymaldaý kezinde týyndaǵan daýlar jergilikti zańnama sheńberinde qaralady. Halyqaralyq baǵyttar boıynsha shart sheńberinde avıakompanııalardyń jolaýshylar aldyndaǵy jaýapkershiligi qatysýshy avıatasymaldaýshylardyń qaǵıdalarymen retteledi jáne týyndaǵan barlyq daýlar qatysýshy tarap memleketteri ratıfıkasııalaǵan konvensııalar men halyqaralyq kelisimderdiń erejelerine sáıkes qaralady», delingen habarlamada.
