Oblystyq polısııa departamenti baspasóz qyzmetiniń málimetinshe, jyl basynan 70 ata-anaǵa QR Ákimshilik quqyqbuzýshylyq týraly Kodeksiniń 127-babymen (Kámeletke tolmaǵan adamdy tárbıeleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý) ákimshilik hattama toltyrylǵan. Bala tárbıesimen aınalyspaǵany úshin 2 zańdy ókildiń ata-analyq quqyǵy shektelgen. Al 3 zańdy ókil osyndaı quqyqtan aıyrylǵan.
«Atyraý qalalyq polısııa basqarmasy ıývenaldy polısııa bólimshesiniń ınspektorlary bul ata-analardyń kámeletke tolmaǵan balalaryn tárbıeleý jáne oǵan bilim berý, onyń quqyqtary men múddelerin qorǵaý jónindegi mindetterin oryndamaǵanyn anyqtady. Sondaı-aq, qalalyq ákimdik janyndaǵy kámeletke tolmaǵan balalardyń quqyǵyn qorǵaý jónindegi komıssııaǵa jasóspirimderdiń tárbıesimen aınalyspaǵan ata-analarǵa jáne qańǵybastyqqa beıim jasóspirimderge qatysty 40-qa jýyq is-qujat joldandy», dep habarlady departamenttiń baspasóz qyzmeti.
Belgili bolǵandaı, Atyraý qalalyq ákimdigi janyndaǵy atalǵan komıssııanyń kezekti otyrysynda bala tárbıesimen aınalyspaǵan 7 zańdy ókildiń is-qujaty qaraldy. Onyń ishinde spırttik ishimdikke áýes 40 jastaǵy azamatsha bar.
«Bul áıeldiń tórt balasy bar. Tuńǵyshy – 18, kenjesi 9 jasqa tolǵan. Atalǵan azamatsha ishki ister organdarynyń jaısyz otbasy esebinde turady. Osy kezge deıin bir mekemede turaqty jumys istemegen. Polısııa qyzmetkerleri oǵan qatysty is-qujattardy kámeletke tolmaǵandardyń quqyǵyn qorǵaý jónindegi komıssııasyǵa birneshe ret joldaǵan. Alaıda, 40 jastaǵy azamatsha alkogoldik ishimdikti ishýin toqtatpaǵan. Balalarynyń tárbıesimen aınalyspaı, túzelý jolyna túspegen. Al anasynyń osyndaı jolda júrgeniniń kesirinen jasóspirim balalary birneshe ret qylmys jasaǵan», dep málim etti baspasóz qyzmetinen.
Komıssııa músheleri atalǵan áıeldi ata-analyq quqyǵynan aıyrýǵa sheshim qabyldady.
