Al endi bólip jikteıtin bolsaq, osy qaryzdyń 4,8 trıllıony tutynýshylyq maqsatta alynǵan. Bul da bir aı burynǵymen salystyrǵanda 3,3, bir jyl burynǵymen salystyrǵanda 16,3 paıyzǵa ósip otyr. Ipotekalyq zaım da qalys qalar emes. Baspanaly bolý jolyndaǵy zaımdar bir jylda 35,5 paıyzǵa bir-aq sekirgen. Nesıe segmentiniń osynshama qarqynmen damyp, taýarlyq nesıe sektorynyń keńeıip, jańa banktik ónimderdiń paıda bolyp, avtonesıeleý men ıpoteka kóleminiń kún sanap óskenine qaramastan, Qazaqstannyń kórsetkishi Reseıden áldeqaıda tómen. Ranking jobasy osyǵan nazar aýdarypty.
«2020 jyldyń qorytyndysy boıynsha jeke tulǵalar nesıesiniń IJО́-degi úlesi 10,7 paıyzdy qurasa, Reseıde bul kórsetkish 18,7 paıyzǵa teń. Tutynýshylyq nesıelerdiń IJО́-degi úlesi 6,2 paıyzdy qurasa, Reseıdegi úlesi 10 paıyzǵa jýyqtaıdy. Armenııanyń kórsetkishi Reseıden de joǵary. Onda jeke tulǵalardyń nesıesi IJО́-niń 27 paıyzyna jetken. Belorýssııada 10,6 paıyz deńgeıinde. Tek Qyrǵyzstannyń ǵana kórsetkishi óte tómen – 2,9 paıyz. Onda qarjy júıesi men nesıe naryǵy óte álsiz», delinedi habarlamada.
Joba zertteýinshe, bizdegi nesıeleý deńgeıi Reseımen ǵana emes, ózge eldermen salystyrǵanda da tómen. Halyqaralyq valıýta qorynyń dereginshe, 2019 jyly qaryz qundy qaǵazdary men úı sharýashylyqtaryndaǵy nesıe kóleminiń jalpy jıyntyǵy ishki jalpy ónimniń 9,74 paıyzyn qurapty. Reseıde bul kórsetkish 19,07 paıyzǵa teń bolsa, ózge elderde odan birneshe ese joǵary, máselen AQSh-ta – 75,34, Kanadada – 101,23 paıyz.
«Memlekettik aqshany qosa alǵanda bankter men qarjy ınstıtýttarynan beriletin bólshek nesıeniń ósimi – kez kelgen eldiń ekonomıkasy men qarjy sektorynyń damý kórsetkishi bolyp sanalady. Ázirge eldegi bólshek nesıe deńgeıi tólemdi keshiktirý turǵysynan qaýipti bolyp sanalmaıdy. Bıylǵy mamyrdyń qorytyndysy boıynsha barlyq nesıe túri boıynsha tólemdi keshiktirý nebári 4,6 paıyzdy quraǵan. Byltyr ol kórsetkish 5,8 paıyz bolǵan edi», dep jazady agenttik.
