Sondaı-aq 1 qańtardan bastap ýchaskelik polısııa ınspektorlarynyń kómekshilerine turǵyn úıdi jalǵa alǵany úshin memleketten ótemaqy tólenedi. Mundaı materıaldyq kómek ýchaskelik ınspektorlardyń ózderine 2019 jyldyń shildesinen bastap berilip keledi.
A.Mılıýktiń aıtýynsha, qazir bul salaǵa kadrlardy irikteý jáne jumysqa ornalastyrý boıynsha biliktilik talaptary kúsheıtilgen.
Búginde ýchaskelik ınspektorlar qylmystyq is júrgizýdi júzege asyryp qana qoımaı, ákimshilik quqyq buzýshylyqtardyń 50-den astam quramy boıynsha óz betinshe jaza qoldana alady.
Eń bastysy – osy qyzmettiń ajyramas bóligi retinde ýchaskelik ınspektordyń kómekshisi mártebesi zańdy túrde bekitilip, olar qazirgi tańda qylmystyq ister boıynsha is júrgizý sheshimderin qospaǵanda, ýchaskelik ınspektordyń barlyq ókilettigine ıe bolyp otyr. IIM-niń ishki rezervi esebinen bıyl shilde aıynan bastap aýyldyq ýchaskelik polısııa ınspektorlary úshin osyndaı laýazymdardy kezeń-kezeńimen engizý bastalǵan.
Bul qyzmettiń materıaldyq-tehnıkalyq máselelerin sheshýge erekshe mán berilip otyrǵanyn aıtqan spıker aldaǵy bes jylda halyq úshin eń qolaıly oryndarda 78 ýchaskelik polısııa pýnktiniń salynatynyn da aıtyp ótti.
«Qazirgi tańda aýyldyq jerlerdegi 1500-den astam ýchaskelik ınspektor ózderiniń qyzmet kórsetiletin aýmaqtarynan alysta turady. Kún tártibinde osy túıindi ońtaıly sheshý, olardy jumys oryndaryna jaqyn mańǵa kóshirý máseleleri pysyqtalýda», dedi IIM ókili.
Jaqynda «102» arnaıy mobıldi qosymshasy paıdalanýǵa berildi. Bul qosymsha arqyly kez kelgen azamat aýdıo nemese beıneqońyraý arqyly polısııaǵa habarlasyp, quqyq buzýshylyqtyń foto jáne beınematerıaldaryn jibere alady. Sóziniń sońynda A.Mılıýk «qadamdyq qoljetimdilik» qaǵıdatyn iske asyrý boıynsha atqarylatyn jumystardyń aldaǵy ýaqytta da jalǵasatynyn aıtty.
