Sońǵy málimetti saralasaq, shilde aıynyń basynan beri óńirde 1 920 indetke shaldyǵý oqıǵasy tirkelgen. Maýsym aıyndaǵy kórsetkishpen salystyrǵanda aıtarlyqtaı kóp. Máselen, maýsymda óńirde 1 449 oqıǵa oryn alǵan bolatyn. Sońǵy ýaqytta karantın talaptary barynsha qataıtylǵanymen, indettiń azaımaı turǵanyn ańǵarýǵa bolady. Onyń eń basty sebebi, halyqtyń óz densaýlyǵyn ózderi oılap, saqtyq sharalaryn saqtamaıtynynda dep aıtýymyzǵa tolyq bolady. Alǵashqy bette birshama aıylyn jıǵanymen, sońǵy aılarda kópshilik jınalatyn árqıly sharalar ótkizý jıilep ketti. Ara-tura ustalyp, aıyppul tólegenimen, at basyn irketin túri kórinbeıdi. Ultymyzdyń darqandyǵy da, burynǵy salt-dástúrin tolyq saqtaı almasa uıat sanaıtyny da kesirin tıgizip tur.
Shilde aıynyń basynan beri Kókshetaý qalasynda – 526, Býrabaı aýdanynda – 221, Bulandyda – 153, Selınogradta – 95 adamnyń indet juqtyrǵany zerthanada tekserilip, rastalǵan. Keıingi bir táýlikte 175 adam indet juqtyrǵan, olardyń 159-ynda indet belgileri anyq baıqalǵan. Sońǵy aptada indet juqtyrý deńgeıi 2,9 esege deıin kóbeıdi.
Búginde indetke shaldyǵýshylarǵa ázirlengen tósektik oryndardyń 49 paıyzy paıdalanylýda. Jansaqtaý bóliminde 82 naýqas jatsa, olardyń beseýiniń jaǵdaıy asa aýyr. Osy joly indetke shaldyǵýshylar arasynda júkti áıelderdiń sany kóbeıgen. 76 júkti áıel koronavırýs juqtyrsa, olardyń 42-si oblys stasıonarlarynda em qabyldaýda.
– Búginde emhanalarǵa baryp, densaýlyǵyna shaǵymdanýshylar sany kóbeıe tústi. Buryn 60 jastan asqandar kóbirek aýyrsa, qazir indetke jastar kóptep shaldyǵýda. Shildeniń ortasyna deıin aýyrǵandardyń 12 paıyzy – balalar, onyń ishinde 1 jasqa deıingiler – 2,1 paıyz, 2-6 jas aralyǵyndaǵylar – 2,9 paıyz, 7-14 jas shamasyndaǵylar – 4,8 paıyz, 15-17 jastaǵylar – 2,1 paıyz. О́tken jylǵy 6 aılyq statıstıkaǵa úńilsek, jarty jylda 1 246 jaǵdaı zerthanalyq jolmen anyqtalyp, olardyń 143-i balalar bolǵanyn anyqtaýǵa bolady. Bıyl 16 577 indet juqtyrýshy aıqyndalsa, onyń 1 818-i – 14 jasqa deıingi balalar. Salystyryp qarasańyzdar, jaǵdaı óte aýyr, – deıdi oblystyń bas sanıtarlyq dárigeri Aınagúl Mýsına.
Vaksınalaý oblysta aqpan aıynan bastap kezeń-kezeńmen júrgizilip keledi. Búginde oblys turǵyndary óz erikteri boıynsha 4 túrli ekpeniń ishinen qalaǵanyn saldyra alady. Vaksınalardyń alǵashqy komponentimen oblysta 190 867 adam qamtylsa, ekinshi bóligin 97 370-i ǵana alyp úlgergen. Jalpy, oblys turǵyndarynyń 46,4 paıyzynyń vaksına qabyldaýǵa múmkindigi bar eken. Koronavırýsqa qarsy ekpe alýdyń nátıjesinde medısına jáne polısııa qyzmetkerleri arasynda indetke shaldyǵý 6 ese tómendegen. Búginde oblysta medısına qyzmetkerleriniń – 93, pedagogterdiń – 69, polıseılerdiń 100 paıyzy ekpe saldyrǵan. Mamandardyń aıtýyna qaraǵanda, oblys turǵyndarynyń 60 paıyzy ekpe ektirgende ujymdyq ımmýnıtet qalyptaspaq.
Aqmola oblysy
