Olardyń bári ózine ǵana emes jol qozǵalysynyń basqa qatysýshylaryna naqty qaýip tóndirdi deýge bolady. Sonyń ishinde jaıaý júrgizýshilerdi de soǵyp ketý qaýpi joǵary.
Ustalǵandardyń biri «Honda» markaly avtokóliktiń júrgizýshisi. Ol Karavannaıa kóshesinde qalaǵa kirip kele jatqanda ustaldy. Medısınalyq kýálandyrý onyń masań kúıde ekendigin kórsetti, ol kólikti orta dárjedegi alkogoldik masań kúıde júrgizip kelgen. Atalǵan fakti boıynsha Ákimshilik quqyq buzýshylyq týraly kodeksiniń 608-baby boıynsha ákimshilik hattama toltyrylyp, is sotqa jiberildi. Osy baptyń sanksııasyna sáıkes quqyq buzýshy endi jeti jylǵa kóliktiń róline otyrýdy umytýyna týra keledi.
Osyǵan uqsas fakti qalanyń Zaısan aýdanyndaǵy Svobodnaıa kóshesinde de anyqtaldy. Tekserý úshin «Toyota RAV4» kóliginiń júrgizýshisi toqtatyldy. Mán-jaıdy anyqtaý barysynda 45 jastaǵy qala turǵyny esirtkilik masań kúıde rólge otyrǵany belgili boldy. Nátıjesinde ákimshilik hattama toltyryldy, ol da jeti jylǵa kólik basqarý quqyǵynan aıyrylmaq.
SQO PD bastyǵynyń mindetin atqarýshy, polısııa polkovnıgi Qanat Aıtbaevtyń aıtýyna qaraǵanda «Mas júrgizýshi» jedel-profılaktıkalyq is-sharasy shildeniń 15-si men 31-i aralyǵynda ótkiziledi. Maqsaty – jol qozǵalysy erejeleriniń óreskel buzýshylyqtaryn anyqtaý jáne onyń jolyn kesý. Tórt kúnniń ishinde jol qozǵalysy erejeleriniń 1995 túrli buzýshylyǵy anyqtalǵan. Sonyń ishinde qaýipsizdik beldigin paıdalanbaý jáne rólde telefondy paıdalanýdyń birneshe júz faktisinen bólek, jyldamdyqty buzýdyń – 171 faktisi, manevr jasaýdyń – 65, sondaı-aq buryn basqarý quqyǵynan aıyrylǵan tulǵalarmen kólik basqarýdyń – 56 faktisi anyqtalǵan.
