Keshe Aqordada Memleket basshysy Nursultan Nazarbaev jańadan taǵaıyndalǵan Qazaqstan Respýblıkasyndaǵy elshilerden Senim gramotalaryn qabyldady, dep habarlady Qazaqstan Respýblıkasy Prezıdentiniń baspasóz qyzmeti.
Prezıdentke Ulybrıtanııa jáne Soltústik Irlandııa Koroldiginiń Tótenshe jáne ókiletti elshisi Devıd Djon Moran, Belarýs Respýblıkasynyń Tótenshe jáne ókiletti elshisi Valerıı Brylev, Iran Islam Respýblıkasynyń Tótenshe jáne ókiletti elshisi Gorban Seıfı, Túrkimenstannyń Tótenshe jáne ókiletti elshisi Maqtymquly Aqmyradov Senim gramotalaryn tapsyrdy. Rásimde sóz alǵan N.Nazarbaev elshilerdi dıplomatııalyq qyzmetteriniń bastalýymen quttyqtady jáne olardyń qyzmeti ekijaqty qarym-qatynastardy jan-jaqty keńeıtýge jáne tereńdetýge, olardyń uzaq merzimdegi damýyn qamtamasyz etýge aıtarlyqtaı yqpal etetinine senim bildirdi. Memleket basshysy Qazaqstan elimizdiń iri saýda seriktesi bolyp tabylatyn jáne qazaqstandyq ekonomıkaǵa tike ınvestısııa tartý kólemi jaǵynan tórtinshi orynǵa ıe Ulybrıtanııamen yntymaqtastyqqa úlken mán beretinin atap ótti. – Londondaǵy qazaqstandyq-brıtanııalyq saýda-ónerkásip keńesiniń kelesi otyrysynyń kún tártibine ekijaqty baılanystardy keńeıtý jáne tereńdetý jónindegi tıimdi sharalar engizilýi qajet dep esepteımin, – dedi N.Nazarbaev. Prezıdent Qazaqstan men Belarýs yntymaqtastyǵy jańa sapaly deńgeıge kóteriletinin atap ótti. – Biz BUU, EQYU, TMD, EýrAzEQ, UQShU aıasynda halyqaralyq arenadaǵy yntymaqtastyqty belsendi jalǵastyryp kelemiz. Bizdiń Keden odaǵyn qurý boıynsha birlesken jumysymyzdy erekshe atap ótkim keledi. Biryńǵaı ekonomıkalyq keńistikti qalyptastyrý jónindegi jumystardy keleshekte birlese otyryp belsendilikpen júrgizemiz degen úmittemin, – dep atap ótti Memleket basshysy. Qazaqstan Iranmen dástúrli dostyq jáne seriktestik qarym-qatynastarǵa úlken mán beredi. – Biz halyqaralyq arenada, sonyń ishinde IKU, ShYU jáne EQU tárizdi uıymdardyń aıasynda tabysty baılanys ornatyp otyrmyz. Qazaqstanda Azııadaǵy ózara yqpaldastyq jáne senim sharalary jónindegi keńesti, sondaı-aq Álemdik jáne dástúrli dinder kóshbasshylary sezin shaqyrý jónindegi bastamany Tehrannyń qoldaýy joǵary baǵaǵa ıe, – dedi Prezıdent. Qazaqstan sondaı-aq Túrkimenstanmen ózara tıimdi yntymaqtastyqtyń odan ári damýyna qyzyǵýshylyq tanytady. – Eki eldiń arasynda birlesken iri jobalar tabysty júzege asyrylýda – biz munaı-gaz sektoryndaǵy yntymaqtastyq týraly kelistik, biz Túrkimenstan arqyly Iranǵa jol salýdamyz – bul kólik-tranzıt keshenin quraýda mańyzdy. Saýda-ekonomıkalyq jáne mádenı-gýmanıtarlyq yntymaqtastyq damıtyn bolady, – dep atap ótti N.Nazarbaev. Brıfıngte sóz alǵan Devıd Djon Moran Qazaqstanda elshi bolyp qyzmet atqarý ózi úshin úlken qurmet ekenine toqtaldy. – Brıtanııa Qazaqstanmen qarym-qatynastardy damytýǵa úlken mán beredi. Eki eldiń arasynda saıası, iskerlik, bilim berý, mádenı jáne áskerı salalardaǵy ekijaqty baılanystar keń aýqymda damyp keledi, – dedi brıtanııalyq elshi. Belarýs Respýblıkasynyń elshisi Qazaqstannyń tabystaryna joǵary baǵa berdi. – Meniń elshi qyzmetindegi jumysym bizdiń elderdiń halqyn odan ári jaqyndastyrýǵa baǵyttalatyn bolady dep úmittenemin, – dedi Valerıı Brylev. Gorban Seıfı Qazaqstan men Iran ekijaqty formatta, óńirlik ári halyqaralyq uıymdar túrinde ózara qarym-qatynastardy tabysty júrgizip otyrǵanyn atap ótti. – Iran men Qazaqstan arasyndaǵy qarym-qatynastar anaǵurlym belsendi damýy úshin óz qyzmetimdi belsene atqaramyn dep oılaımyn, – dep atap ótti Iran Islam Respýblıkasynyń elshisi. Túrkimenstan elshisi Qazaqstan men Túrkimenstan arasynda birde-bir sheshimin tappaǵan nemese problemalyq másele joq ekenine nazar aýdardy.
