Músinshi álemi

Kenep betinde taǵy bir sulba. Tańsyq emes, tamyryn ba­syp kórseńiz ónerden alshaq jan emesteı. Kıim kııý ádebi, úlken kózildirigi, shalt qımyly hám saýsaqtaryna deıin onyń ómirinen habar berip turǵandaı. Portretke jan bergen sýretshiniń sheberligine suqtana qarap, keıip­keriniń kim ekenin ańdaýǵa bolady. Adamnyń artyna qarap-aq aldyndaǵy jolyn baǵdarlaý ońaı. Bizdi osyndaı pikirge jetelegen kartına ıesiniń sheshimi óz ornyn tapqandaı kórinedi.

«Músinshi E.Mergenovtiń portreti». Týyndynyń tolyq ataýy osy. Kimniń qolynan shyqqan deseńiz? Halyq sýretshisi Leonıd Leontevtiń eńbegi. Sheberdiń je­ke shyǵarmashylyǵyna toqta­lý­dyń qajeti joq shyǵar, oı­ly oqyrman osy esimniń ózin sýret­kerliktiń úlken úlgisi retin­de qurmetteıdi.

Vertıkal formattaǵy kenep betine kórermenge arqasyn berip turǵan músinshi beınelen­gen. Ol – Qazaqstan beıneleý óne­riniń tarıhy men damýyna óz qoltańbasyn qaldyrǵan alpysynshy jyldary shyqqan talantty býyn ókili. Másele munda emes. Portret naǵyz músinshiniń tulǵasyn tartý etedi. Jeke tol­ǵanysty ústeı otyryp, kelesi bir álemniń esigin ashady.

Sýretshi óz kartınasynda beıdástúrli amaldy qoldanady. Mine, eń ǵajap sát. Qarańyzshy, músinshiniń portretin arqasynan qarap jazǵan. Erkin Mergenov basyn janyna buryp tur. Biz ataqty músinshiniń qyrynan qara­ǵandaǵy baısaldy tanys beınesin kóremiz. Bul jerde kó­lemnen góri tańba basym. Qara shash pen qońyr jeletke jáne aq jeıde men ashyq tústi shalbar qarama-qarsylyq. Músinshiniń ómirdegi qaıshylyqtary desek bolatyndaı.

Qandaı da bolsyn kezdeısoq elementter jazylmaǵan. Birtústi jazyqtaǵy músinniń sulbasy erekshe kóńil aýdartady, osy arqyly ol fonnan bólinip tur. О́tkir, keı jerleri jatyq sulba tik­syzyqty torlardyń ishine kir­gizilgen, sodan músinimiz azdap rabaısyz jáne tulǵaly kórinedi.

Shyntýaıtynda Erkin Mer­ge­nov músin ónerinde osyndaı dara bolǵan. Ol – avangardshy jáne modernshi, týyndylary eshkimdi de beıjaı qaldyrmaıdy. Bireý­lerdi tánti etip tańǵaldyrsa, en­di bireýlerdi qabyldaı alma­sa da, barlyǵynyń jadynda qa­lyp óner jáne ómirdiń máńgilik qun­­dylyqtary týraly oılanýǵa májbúrleıdi.