Rektor Gúlzada Shakýlıkovanyń aıtýynsha, ýnıversıtetke «Injenerııa jáne ınjenerlik is», «О́ndiristik jáne óńdeý salalary» mamandyǵyna bilim berý qyzmetin júzege asyrýǵa lısenzııa berilip otyr.
«RhD doktorlardy daıarlaý ýnıversıtettiń ǵylymı-zertteý ınfraqurylymy bazasynda iske asady. Bizdiń ýnıversıtette bilim alǵan PhD doktoranttary dıssertasııalyq zertteý jumysyn daıyndaý úshin Polsha, Fransııa, Ońtústik-Shyǵys Azııa, AQSh sekildi shetelderdegi joǵary oqý oryndarynda bilim alý múmkindigine ıe bolady. Qazir bilim berý ekojúıesinde munaı-hımııa ınjenerııasy jáne ekologııa ınstıtýtyndaǵy zertteý beıinindegi 15 zerthana, «Embimunaıgaz» AQ qoldaýymen salynyp jatqan oqý-óndiristik alańy bar. Munda bizdiń stýdentter, magıstranttar men doktoranttar jer qoınaýyn barlaýdan bastap munaı ónimderin óńdeýge deıingi barlyq jumysty júzege asyra alady», deıdi ýnıversıtettiń basqarma tóraǵasy-rektor Gúlzada Shakýlıkova.
Sondaı-aq atalǵan oqý ornynda jumys berýshiler men eńbek naryǵyndaǵy suranystarǵa sáıkes, jańa oqý jylynda buryn bolmaǵan baǵdarlamalar iske qosylǵaly otyr. Sonyń qatarynda «Mashına jasaý tehnologııasy», «Aqparattyq qaýipsizdik», «Munaı marketıngi jáne munaı tasymaldaý» mamandyqtary bar. Al, «Avtomattandyrý jáne basqarý», «О́mir tirshilik qaýipsizdigi jáne qorshaǵan ortany qorǵaý» baǵytynda magıstratýra baǵdarlamasy ashyldy.
