– Tileýberdi aǵa, músin óneri kózdi ǵana qýandyryp qoımaıdy, onyń adamdardyń boıyna tárbıe dánin egetinin, qorshaǵan ortada qolaıly ahýal qalyptastyratynyn, tipti keleshekti de aıqyndaı alatyn kúshi bar ekenin baıqaımyz. Sonda eskertkishter, músinder adamǵa qandaı qasıetimen áser etip, qalaı tárbıeleıdi?
– Qalyptan tys oılaıtyn qııalymen óz ortasynan daralanyp turatyn músinshiniń qolynda hırýrgtiń ota jasaıtyn skalpeline uqsas asa qýatty qural bar. Myqty hırýrg bolsa, ómir men ólimniń ortasynda jatqan naýqasqa kúrdeli ota jasap janyn saqtap qalady, eger biliksiz bolsa, qatelesse, ony ajal qaptyrady. Músinshiniń jumysy da osyǵan uqsas. Músinshi qolynan shyqqan dúnıesine jan ǵana sala almaıdy – jan salatyn Alla, týyndynyń qalǵan máńgilik ómiri músinshiniń qolynda. Qııalymdaǵy dúnıeni júzege asyrsam, arqamnan júk túsip, jeńildep qalamyn. О́kinishke qaraı, músin ónerin ekiniń biri túsine bermeıdi, tipti oǵan mán de bergisi kelmeıdi.
Adam 95% aqparatty kózimen alady. Biraq ony ózi baıqamaıdy. Al qorshaǵan orta, tóńiregimiz nemen toltyrylǵan? Mán beremiz be osyǵan? Biz qanshama Bógenbaıdyń eskertkishin qoıdyq, neshe Naýryzbaıdy atqa qondyrdyq, batyrlardy áli túgendep bola almaı jatyrmyz. Biraq batyr bolsyn, bı-baǵlan, er bolsyn, jaqsylap jasap, bir danasyn ǵana qoısa, sonyń ózi jetip jatyr edi. Al qazir kezinde qol bastaǵan batyrlardyń búgingi urpaǵy soqqan eskertkishteriniń ózi tutas bir armııaǵa aınaldy. Batyrdyń eskertkishin soǵa bergen saıyn onyń qadiri kemimese, artpaıdy. О́kinishtisi, músin óneri – pafos pen bızneske aınaldy. Al shyǵarmashylyqty eshkim qoldamaıdy. Osydan kelip óner aqsaıdy. Mysaly, meniń «Dala daýysy» degen kompozısııam bar. Týyndyma uly dalanyń sımvoly balbaltastardy arqaý ettim. IV ǵasyrdan beri kele jatqan máńgilik eskertkishterdi jaı ǵana músindep qoımaı, olardyń qolyna sazsyrnaı, jetigen, daýylpaz, syldyrmaq, shańqobyz, dombyra sekildi ulttyq mýzyka aspaptaryn ustatyp, birge tańbaladym. Dalanyń sımvoly – tasbaqa. Tasbaqa tek alǵa qaraı júredi, las jerdi baspaıdy, jaman jerge jolamaıdy, eshkimge tıispeıdi, qııanat jasamaıdy, kóp jyl ómir súredi, adal jáne shóptiń tazasyn ǵana jeıdi. Sondyqtan balbaldardy tasbaqanyń ústine qondyrdym. Bul beıne kóz toqtatyp qaraǵan adamnyń zerdesindegi kóshpendilik, dalalyq, danalyq rýhty oıatpaı qoımaıdy. Al bul ınstınkt ulttyq tárbıede úlken ról oınaıdy.
– Almatyda músin óneriniń týyndylary, eskertkishter az ba, kóp pe?
– Músin kóp, biraq ishindegi qundysy az. Jeke ózime eki eskertkish, Muhtar Áýezovtiń tikeleı aralasyp, aqyl-keńesi arqyly dúnıege kelgen Hakimjan Naýryzbaevtyń Abaı eskertkishi men Ádilet Jumabaıdyń «Altyn adam» monýmenti unaıdy. Qııaly qııandy sharlaıtyn talantty músinshi Á.Jumabaı monýmenttegi Altyn adamnyń turpatyn tuńǵysh ǵaryshker Toqtar Áýbákirovten alǵan. Odan bergi ýaqytta da san túrli músinder qoıylyp jatyr, alaıda solardyń ishindegi sándisi de, mándisi de ázirge osy ekeýi ǵana dep bilemin. Kóz toqtatyp qaraýǵa turarlyq músinder joq emes, biraq olar saýsaqpen sanarlyq. Eshkimniń tapsyrýynsyz, jan qalaýyńmen jasalǵan jumystyń ǵumyry uzaq, máńgilik bolady. О́kinishke qaraı, músinshiler qazir tapsyrystyń quly bolyp ketti. Al tapsyrys shyǵarmashylyqty taptap barady. Qazir qaı qalada bolsa da memlekettik tapsyryspen jasalatyn músinder qaptap ketti. Músinshi uqsastyq izdegenimen, onda tapsyrys berýshiniń pikiri, aıtqan keńesi qaperge, usynysy esepke alynady. Al bul shyǵarmashylyqty óltiredi. Biz tapsyrys pen shyǵarmashylyqtyń arajigin ajyratýdan qalyp baramyz. Mysaly, kez kelgen salanyń mamanyna «sen olaı isteme, bylaı iste», aqyn men jazýshyǵa «shyǵarmańdy olaı jazba, bylaı jaz» dese, qalaı qabyldaǵan bolar edi? Al músinshige tapsyrys berýshi buıyrady. О́z kózqarasyn tańady. Bul júıkege de, yntańa da sózsiz áser etedi. Boıyndaǵy bar qabiletin jarqyrata kórsetip, talantyn ıgerýdi ǵana maqsat tutatyn jastaǵy keıingi býynnyń ózi shyǵarmashylyqty ysyryp tastap, tapsyrys oryndaǵysy kelip turady. Báriniń armany kóbirek aqsha tabý, baıý. Úı alǵysy keledi, kólik mingisi keledi. Bári durys. О́ıtkeni músinshi de tirshilik úshin talpynǵan ózekti jan, kúnkóris úshin, bala-shaǵanyń qamy úshin, amal joq, aıtqanyn oryndaýǵa májbúr. Biraq óner jankeshtilikti, qurbandyqty qajet etedi. Turmystyń deńgeıine deıin tómendep, kúnkóris sońynda júrip, osyny esten shyǵarsaq, sonda sorlaımyz ba dep qorqamyn.
– Músin týyndylary qandaı maqsatta qoıylýy kerek?
– Músin ártúrli maqsat arqalaıdy. Eldik muratty kózdegen memlekettik aýqymdy ıdeıadan bastap turmystyq taqyrypqa deıingi barlyq dúnıe qamtylady. Biraq onyń ózeginde jyltyraǵan jaqsy úmit, rýhty oıatatyn kúsh, ulttyq tárbıe maqsaty jatýy kerek. Qala keńistigin tas tuǵyrdaǵy tulǵamen, basqa da týyndylarmen tolyqtyratyn kezde jaýapty shendiler «ne úshin?» degen suraqty ózine bir márte qoıyp kórse, artyq emes. Mysaly, meniń «Jeti ata» degen kompozısııam daıyn tur. «Jeti atasyn bilmegen jetesiz» deıdi qazaq. Jeti ataǵa deıin qyz alyspaı, tegin saqtaǵan ultymyz úshin óte mańyzdy qundylyq. Munda búkil qazaqtyń jeti atasyn sıpattadym. Jasaǵan jumysymda bári sımvolıkalyq mánge ıe. Jeti atanyń túpki arǵy atasy retinde batyrdy beıneledim. Ol bálkim Alpamys, múmkin Bógenbaı, Naýryzbaı bolar, batyry kóp ultymyzdyń bir eren ulyn shartty túrde aldym. Ekinshi, mýzyka. Oǵan qolyna qobyz ustaǵan Qorqytty aldym. Úshinshi ataǵa bıdi beıneledim. Qara qyldy qaq jaryp, ádil úkimin kesip, dala sotynyń qyzmetin atqarǵan bıler – ultymyzdyń basqarý-qurylymdyq júıesindegi mańyzdy ınstıtýt. Aqyl-oıdyń keni Ál-Farabı bilim men biliktiń sımvoly retinde tórtinshi atany keıiptedi. Qaı halyqtyń taǵdyrynda da din men ıman qatar júredi, adamnyń júregine rýhtyń dánin egip, jer betindegi uly zańdylyqty rettep turǵan Jaratýshynyń ilimin jyrlap ótken Ahmet Iаsaýıdi besinshi ata bolýǵa laıyq kórdim. «Jeti ata» kompozısııasy eldiń basyn birlikte ustap, jerin qasterleýmen ótken hanmen túıindeledi. Iаǵnı kúlli qazaq eliniń taǵdyry men tarıhy jolynda uly murat arqalaǵan tulǵalarymyzdy tutas qamtýǵa tyrystym.
«Jeti qazyna» degen jobam da tamyry tereńde jatqan ulttyq uǵymǵa oraılas jasalǵan dúnıe. Munyń bárin urpaq bilýi tıis. Sanada óshpeýi kerek. Ol úshin bári kóz aldynda saırap turýy kerek. Osylar ornatylatyn bolsa, bul jastarǵa ónege bolatyn edi. Shyn shyǵarmashylyqpen shuǵyldanatyn músinshi qarabaıyr ıdeıadan aýlaq bolady. О́ner áleminde ulttyq rýh sińirilgen ıdeıa jetip artylady. Qyz Jibek, Baıan sulý sekildi arý qyzdar, baı balasy men jarly balasy Asan men Úsen, «Qarlyǵashtyń quıryǵy nege aıyr?» anımasııasy, qaısybirin sanamalaıyn, balalarǵa qurǵaq aqyl aıtýdyń keregi joq, osylardyń ishinen laıyqtysyn al da, kósheńe ákelip qoı, kim bolý keregin, qandaı bolý keregin sol tas keıpimen óz-aq aıtyp, úıretip beredi. Máskeýge barsań, Chebýrashka men Genaǵa deıin eskerkish qoıyp tastaǵan. Izdense, jasaýǵa nıet bolsa, eń bastysy, ákimshilik-basqarý júıesi tarapynan qoldaý bolsa, ulttyq personajdar ózimizde de jetedi.
– Músin týraly bizdiń kózqarasymyz qyzyq. Eýropany tutas aralamaǵan adamnyń ózi ondaǵy anadan jańa týǵandaı anatomııalyq eskertkishter týraly jaqsy biledi. Shetinen shedevr. Tańyrqap, tańdaı qaqpasa, solardy eshkim tildemeıdi de, kúndemeıdi. Qaıbir jyly Nur-Sultandaǵy «Han Shatyrdyń» aldynda jańbyr astyndaǵy serýennen keıin ústindegi kıimi denesine jabysqan qyz ben jigittiń shaǵyn ǵana músini paıda bolyp edi, búkil qoǵam óre túregelip, músinshisin aǵash atqa teris mingizdi. «Músinshi ne jasasa da, týyndysynyń bet monshaǵy úzilip tursyn» dep kesip-piship sheshim shyǵaryp berdi. Kóptiń osy oıyna ne deısiz, mundaı kózqaraspen músin ónerine qııanat-obal jasap turǵan joq pa?
– Áıeldiń sulýlyǵy – denesinde. Jalańash dúnıege esh qarsylyǵym joq. Jaqsy túsinemin. Biraq mundaı sulýlyqpen baılanysty dúnıeler mýzeıde, kórkemýret galereıalarynda tursa, jarasymdy. Bizdegi dil basqa, din basqa, úlkendi qurmet tutyp, dástúrge baǵynǵan elder ashyq-shashyq dúnıeni qabyldaı almaıdy. Qyzdarymyz bııazy, kelinderimiz ıbaly, erlerimiz iltıpatty, qadym zamannan kele jatqan osy qasıet qansha jerden qojyrady degenimizben, túp-tamyrymen joıylǵan joq. Bul qasıet bizdiń moraldyq kodeksimiz sııaqty, endeshe mundaı qarsylyqtyń týý sebebin de túsinýimiz kerek. Kóshe úlkenniń de, kishiniń de, erdiń de, áıeldiń de júretin jeri, kópshilik jerge jynystyq tartymdylyǵy atoılap turǵan jumysty ornatar kezde abaılaǵan durys. Músinshi onsyz da tabıǵatynan erkindikti súıetin, sheńberden shyǵyp erkin oılaıtyn adam, al endi oǵan aýylda týmaǵan, asfaltta ósken, shetelde bilim alǵan, shekten tys erkindigin sińirgen «qasıet» kelip qosylsa, qudaıdyń odan ary atqany deı berińiz. Mundaı tárbıemen qalyptasqan músinshiler ulttyq haraktermen jasalǵan jumysqa «mámbetızm» dep qaraıdy. Ádet-ǵuryp, salt-sana, dástúrińdi saqtamaq túgili, túsingisi de kelmeıdi.
– Almatynyń kórikti oryndaryna qoıylǵan shetel músinshileriniń jumysy óte kóp. Jat tanymnan týǵan, ózge topyraqtan nár alǵan jumystar óte qymbatqa baǵalanyp, ónerdiń ozyq úlgisi retinde usynylyp otyr. Jasaǵan músini Dısneıdiń anımasııalyq fılmderindegi keıipkerler sekildi ne adamǵa, ne haıýanǵa uqsamaıtyn, biraq sol jumysyn biregeılik dep tańatyn músinshiler ózimizde de jeterlik. Músin emes, ınstalıasııa deńgeıindegi dúnıeni biz nege músin dep qabyldaýymyz kerek?
– Proporsııa men anatomııalyq aýytqýshylyqty «sıýrrealızm», «oıbaı, jańashyldyq, biz jańa baǵyt ákeldik» dep daýsy jer jarǵan músinshilerdiń jasaǵan jumysyn bizdiń ata-babalarymyz III-IV ǵasyrda balbal tastar beınesinde ómirge ákep qoıǵan. Qazaq dalasyndaǵy kez kelgen balbaldy kózińizge elestetip kórińizshi. Stılge baı, músinniń budan asqan zamanaýı úlgisin taba alasyz ba? Bizdiń taý men tasqa qashalǵan petroglıfterimiz, sadaq tartqan, atpen shaýyp bara jatqan, qoshqar múıizder, ártúrli ańdardyń keskini zamanaýı álemdik músin ónerinde áli kúnge suranysqa ıe sándi óner bolyp sanalady. Sodan beri on bes ǵasyr ótti, jańashyldyǵyn áli joǵaltqan joq. Osy músindi qashaǵan atalarymyzǵa eshkim tapsyrys bergen joq, kernegen júrekti jaryp shyqqan uly óner máńgilik eskertkish bolyp qaldy. Al qazir aq qaǵazdyń bir búıirinen ekinshi buryshyna qara qalammen belinen bir tartady da, «sıýrrealızm» deıdi. Jaqsylap qarasań, álgi maǵynasyz bir syzyq bizdiń tasqa qashalǵan tańbalarymyzdyń ózgeriske ushyraǵan kóshirmesi. Kópshiligimiz músin dep atap júrgen jobalar qoldanbaly sándik-dızaın deńgeıindegi jumystar. Zattardyń betin árleý, sándeý úshin qoldanylatyn syzba, sýretter músinge aınalyp ketti. Ártistiń bári jýrnalıst bolyp ketkeni sııaqty sýretshilerdiń de kópshiligi músinshige aınalyp ketti. О́ıtkeni olar músin ónerine aqshany kúrep tabatyn tabys kózi dep qaraıdy. Árkim óz isimen aınalyspaýynyń kesirin óner solǵyn tartyp otyr. Qadaǵalap, baqylaý jasap otyrǵan eshkim joq. Mysaly, men Almaty qalasy boıynsha eskertkishter jónindegi komıssııa múshesimin. Qaı jerge qandaı eskertkish qoıylýy kerek, bári bizdiń saraptaýymyzdan ótedi. Belden basqan júgensizdikti kórgende keıde shyryldap ketemin. Biraq «jalǵyzdyń úni shyqpaıdy», basqalarynyń daýsy basym bolǵannan keıin kóńilden shyqpaıtyn kóp jumys ótip ketip jatyr, ókinishke qaraı.
– Qyrýar músinshilerimiz táp-táýir týyndylaryn qaıda qoıaryn bilmeı qaqtyǵyp júrgende, jat jurttyń sanaǵa sińbeıtin jumysyna qajettilik qaıdan týyp otyr?
– Bul – úlken másele. Biraq bir nárseni myqtap este ustaǵan jón. Elimizge keletin sheteldik týrıster qalany aralap, qazaq degen elmen tanysyp júrgende, eń aldymen músinniń ulttyq nobaıyna, tól ereksheligine nazar aýdarady. Eger Eýropa elderindegi músinderdiń aına-qatesiz kóshirmesi bolsa, olar kúledi de, qolyn bir siltep, kete beredi. Bizde qazaqsha oılaıtyn talantty músinshiler óte kóp. Solardyń jumysy kópteý qoıylsa, ol bizdiń ónerimizdiń ulttyq biregeıligin arttyra túsedi. Biz eshqashan aǵylshyn, fransýz, nemis bola almaıtynymyz sııaqty, onyń ónerine eliktep, olardan oza almaımyz. Tek ulttyq daralyǵy aıqyn óz ónerimizdi dáripteý arqyly ǵana ózgeni moıyndata alamyz. Kózqarasymyz da, qoltańbamyz da, stılimiz de qazaqsha bolýy kerek.
– Ultymyzdyń órkendeý satysyndaǵy músin ónerin álemdik shedevrlermen shendestirgenimiz uıat ta shyǵar, biraq Roden, Mıkelandjelo, Bernınıdiń qaıtalanbaıtyn ǵajaıyp músinderindegi jandy ómir, qozǵalys, oıdy berýdegi sheberlikti keıingi ǵasyr músinshileri qaıtalaı almady. Olardyń jasaǵan beınesi qozǵalysqa baı, qabaǵyn túıse qaharly, kúlse kúnniń ózi birge kúlgendeı jandy áser qaldyrady. Otandyq músinshilerimizdiń kóńiline kelmesin, sońǵy jyldary qoıylǵan eskertkishter men músinniń bári buryn-sońdy dál osylaı «shtampovkaǵa» urynbaǵan bolar. Bul izdenistiń joqtyǵynan ba?
– Eýropanyń qaıta órleý dáýirindegi klassıkasyn endi eshkim qaıtalaı almaıdy. Ol dáýir ótti, ketti. Qazir Mıkelandjelony on oraıtyn sheberler bar. Oqyǵan, bilimdi, qarny toq. Ol zamanda shyraǵdanmen jumys istese, qazir samaladaı shamnyń astynda otyryp jumys isteıdi. Túrtip qalsań, kirpigin qaǵyp jiberetindeı Djakondany qazir salyp beredi. Biraq ol eshqashan Leonardo da Vınchı bola almaıdy. Sebebi Djakondony Leonardo salyp ketti. Ol kartınada sulýlyq bar, sheberlik bar. Al búgingi talǵam basqa. Basqa tolqyn keldi. Qalyptasqan formany, klassıkadaǵy dástúrdi, proporsııany byt-shyt qylyp buzyp, XX ǵasyrdyń sýret ónerine alasapyran jańalyq ákelgen Van Gog uly sýretshi bolyp tanyldy. «Balalyq shaǵym sýyq, muńly, bos bolyp ótti» dep qamyqqan Van álemdegi eń qymbat sýretshi bolyp shyǵa keldi. Van Gogtyń kartınalary bútin bir eldiń ekonomıkasyn kóterip otyr. Mıkelandjelony qaıtalaıtyndar shyǵatyn bolsa, ol sózsiz kúlkige qalady, óner qurdymǵa ketedi. Búgingi músin ónerindegi áldeqaıda damyp ketken tehnologııany keshegimen salystyra almaısyń. Músin, eń aldymen, oı salýymen erekshelenedi. Qııal qanattandyrǵan tas beınege qarap turyp «ne aıtqysy keldi?» dep oılanasyń, tolǵanasyń, aqyry sýretkerdiń jan aıqaıyn túsinip, jaýabyn tabasyń. Mine, bul óner osynysymen mándi. Músin ónerinde sheberlik mańyzdy sekildi kórinedi, biraq qııalǵa jasyrylǵan týǵan ishki oı odan da mańyzdyraq.
– Keshegi eskertkishterimizdiń bári eńseli, aıbarly edi. Alyp Abaı, mańǵaz Muhtar, oıly Shoqannyń eskertkishteri Almatynyń ár buryshynda bolsa da, ádemi ansambl qurady. Al qazir músin týyndylarynyń bir qoldan shyqqandaı uqsas jáne jyldan-jylǵa usaqtalyp bara jatqanyn baıqaımyz. Nege olaı?
– Munyń bári sheberdiń sheshimine baılanysty. Ártúrli sebebi bolýy múmkin. Aýqymdy, monýmentaldy jumystyń ýaqyty ótti demeımin, biraq búgingi baǵyt-baǵdardyń ózi osyǵan ákele jatyr. Jastaý kúnimde Shámshi Qaldaıaqovpen kóp joldas bolyp, birge júrdim. Jıyrma jasymda Qajymuqannyń eskertkishin soǵyp, ózimdi álemdegi eń dańqty adam sezinip, erkelep júrgen kezim. «Sen ne bitirdiń? Qandaı oqý oqydyń?» dep surady birde Shámshi aǵamyz. «Eshnárse bitirgem joq» dedim. «E-e-e, onda sen ekeýmiz samorodok ekenbiz» dedi máz bolyp. Bir kezdeskende «Sen Reseıde oqyǵanyńda Eýropaǵa eliktep, buzylyp keter ediń. Osynda qalyp qoıǵanyń durys boldy. Seniń utqanyń aýylda óskeniń, qazaqy bolmysyńdy saqtaǵanyń» degeni bar. Shámshi aǵam aıtqandaı, ýaqyt bıiginen kóz salyp qarap otyrsam, ne jasasam da, ulttyq rýh sińgen júrekpen jasaǵan jobalarym meni jolymnan jańyldyrmaǵan eken. Jasandylyqqa uryndyrmaǵan eken.
– Túrlenip, túlep kele jatqan jańa Túrkistanǵa Abaıdyń, Ál-Farabıdiń, Shámshi Qaldaıaqovtyń jáne elimizdiń Tuńǵysh Prezıdenti – Elbasy Nursultan Nazarbaevtyń eskertkishteri ornatyldy. Tórteýiniń de avtory jolyńyzdy qýǵan músinshi qyzyńyz Gúlfııa ekeýińiz. Bulardyń bári de tapsyrys qoı, arasynan shyǵarmashylyq joldy qalaı taptyńyz?
– Qazaqtyń Mıkelandjelosy, Qazaqstannyń halyq sýretshisi Hakimjan Naýryzbaevty ózime árqashan úlgi tutamyn. Kezinde ustazym ultqa qyzmet etý týraly kóp aıtýshy edi. Sodan da bolar, kezi kelip jatsa, mańdaıymnyń ashy teri sińgen týyndymdy tegin tartý etip jiberemin. Týrıstik baǵytta damytýdy qolǵa alyp, qarqyndy qurylystar júrgizilip jatqan Túrkistan ortalyǵyna jańa eskertkishter ornatý máselesi kópten beri aıtylyp keledi. Álem kezdeısoqtyqqa qurylmaǵan. Taǵdyrdyń ózi tabystyrǵan Shámshi aǵammen talaı jylǵy rııasyz adal dostyq ony máńgilik tas tuǵyrda beıneleýge septigin tıgizdi. Kompozıtormen ótken shýaqty kúnderimniń esteligi shabytyma shamshyraq boldy. Baǵasyn el berer, biraq aǵam úshin, eliniń erke uly úshin bar kúshimdi aıamaı jumsadym. Abaı, Ál-Farabı, Abylaı han músinderi erterekten shabyttanyp jasaıtyn erekshe dúnıelerimniń qatarynda. Jalpy, Ál-Farabıdi kóp zerttegen adammyn. Zer salyp qaraǵan kisi meniń Ál-Farabıimniń sáldesiniń bıikteý ekenin birden baıqaıdy. Ǵaryshpen baılanysyp turǵan Otyrardyń bir munarasy degen ıshara-ıdeıamen jasalǵan. Meniń taǵy bir Ál-Farabıim Qazaq ulttyq ýnıversıtetiniń jýrnalıstıka fakýltetiniń foıesinde tur. Al Elbasy eskertkishiniń óz ereksheligi bar. Ol este joq eski zamannyń keıipkeri emes, kúnde kórip júrgen ózimizdiń zamandasymyz. Túrkistandy oblys ortalyǵyna aınaldyryp, rýhanı astana esebinde qaıta túletý bastamasy Elbasynyń erlik-eńbegi. Qoladan quıylǵan eskertkishte Nursultan Ábishulynyń egis dalasyn aralap júrgen kezindegi sýretin negizge ala otyryp, múmkindiginshe qarapaıym beıneleýge tyrystym. Týǵan jeriniń aýasymen keń tynystap, kostıýminiń etegin jel terbep, alysqa kóz salyp turǵan tulǵasy eńseli eskertkishterimizdiń qataryn tolyqtyra tústi dep oılaımyn.
Estetıkalyq asyl murattyń jolynda ter tógip kele jatqan kez kelgen sýretker óz ýaqytynyń serigi bolyp, onyń eń qundy armanyn beıneleýge tyrysady. Sońyna óshpes iz qaldyrǵan bir tarıhı tulǵany sheberler ár ýaqyt kezeńinde ártúrli etip beınelep jatatyny sondyqtan. Alaıda óz zamanyn beınelegen sýretkerdiń qaısysy bolsa da, eskertkishtiń máńgilikke soǵylatynyn, sol sebepti ony jasaǵan kezde ózi ómir súrgen ǵasyrdyń eń bıik ólshemimen qaraý keregin esten shyǵarmaǵany abzal.
– Áńgimeńizge rahmet.
Áńgimelesken
Aıgúl AHANBAIQYZY,
«Egemen Qazaqstan»
