Shtab otyrysynda Denısov, Jangeldın, Uzynkól aýdandarynyń ákimderi óz óńirlerindegi epıdemııalyq jaǵdaı týraly baıandady. Al monıtorıngtik top ókilderiniń sózinshe, oblystaǵy kóptegen bıznes nysany áli de bolsa tártipke baǵynbaı otyrǵanyn málimdedi. Mysaly, monıtorıngtik toptar 1 maýsym men 16 shilde aralyǵynda 3 666 tekserý júrgizip, 178 nysannyń karantın talaptaryn buzǵanyn anyqtaǵan.
Jıyn barysynda jedel shtab múshelerine karantın talaptarynyń saqtalýyn baqylaýdy qataıtýdy qadap tapsyrǵan aımaq basshysy indetke qarsy ekpe jasatqandardyń kún sanap eselenip kele jatqanyn aıtty.
– Sońǵy málimet boıynsha 222 myńnan asa adam vaksınanyń birinshi komponentin qabyldady. Búginde oblys halqynyń 44%-y ekpe jasatty. Al 114 myńǵa jýyq adam, ıaǵnı oblys turǵyndarynyń 22,4%-y vaksınanyń ekinshi komponentin qabyldady. Búginde oblysqa vaksınanyń birinshi komponentiniń 259 500 dozasy, ekinshi komponenttiń 183 250 dozasy jetkizildi. Qazir ınfeksııalyq aýrýhanada 586 adam emdelip jatyr, – degen Arhımed Muhambetov oblys turǵyndaryn ýaqtyly ekpe jasatyp alýǵa úndedi.
Oblystyń bas sanıtar dárigeri Ermuhanbet Dáýletbaevtyń aıtýynsha, Qostanaıdaǵy ınfeksııalyq aýrpýhanada emdelip jatqan naýqastardyń kóbi vaksına saldyrmaǵan.
– Sońǵy apta ishinde aımaqta indetke shaldyqqandar sany kúrt ósip, COVID-19 juqtyrý kórsetkishi kúnine 53-ten 141-ge deıin jetti. Búginde oblysta ornalasqan 22 stasıonardaǵy oryndardyń 44%-y toldy. Qazir jansaqtaý bólimindegi 100 tósektiń 34-inde naýqastar jatyr. 22 naýqastyń jaǵdaıy aýyr. Naýqastardyń kóbi – 60-70 jas aralyǵyndaǵy adamdar. Aýyr naýqastardyń eshqaısysy vaksına qabyldamaǵan. Alaıda ekpe saldyrǵan adamdar da aýyryp qalýy múmkin. Mundaı naýqastar shamamen 0,7% bolady, – dedi E.Dáýletbaev.
Qostanaı oblysynda 3 sáýirden beri 18 547 adam indet juqtyryp, 17 014 naýqas emdelip shyqqan.
Qostanaı oblysy
