Batys Qazaqstan oblysynda búgin 79 saılaý ýchaskesi jumys istep, 31 aýyldyq okrýgtiń ákimi saılanyp jatyr. Sonyń ishinde biz barǵan Terekti aýdanynda 4 aýylda saılaý ótýde eken. Aýdandaǵy eń úlken eldimeken – Podstepnoı aýyldyq okrýgi aýmaǵynda 10370 adam turady. 6712 saılaýshy okrýg aýmaǵyndaǵy 5 saılaý ýchaskesinen daýys berip jatyr eken. Biz aýyldyq mádenıet úıinde ornalasqan №384 saılaý ýchaskesine tańerteńgi 10.00. saǵat shamasynda bardyq. Mádenıet úıi aldynda uıymdasyrylǵan aýyl sharýashylyǵy jármeńkesi, alystan estiletin qazaqy áýender búgingi is-sharaǵa merekelik sıpat berip tur eken.
«2197 saılaýshy bar tizimde, qazirgi ýaqytta birinshi ret bolyp jatqan saılaý ǵoı, kelip jatqan kisilerdiń kóńil-kúıi jaqsy, úlken adamdar meıram sııaqty kelip jatyr, bizdi meırammen quttyqtap jatyr, kútip otyrmyz, jaqsy daıyndyq ótti. Kenttiń ózinde 3 saılaý bólimshesi bar. Halyqqa rızamyz, karantındik talaptardy túsinip, saqtyq sharalaryn saqtap jatyr. Bizdiń saılaý ýchaskesi boıynsha eki saǵattyń ishinde tirkelgen saılaýshylardyń 12 paıyzy daýys berdi», deıdi №384 saılaý ýchaskelik saılaý komıssııasynyń tóraǵasy Gúlaıym Saǵyndyqqyzy.
Biz kólik tiregen kelesi meken – Aqsýat aýyly boldy. Okrýgte jalpy sany 2967 adam turady. Okrýg quramyna ortalyqtan bólek Magıstralnoe, Poıma, Áıtıev sekildi shaǵyn aýyldar kiredi. Oblys ortalyǵyna jaqyn, topyraǵy qunarly, sýly-nýly jerde ornalasqandyqtan, halyqtyń ál-aýqaty jaqsy ekeni sezilip tur. Okrýgte eńbekke jaramdy 1355 adamnyń 1277-si jumyspen qamtylǵan. Okrýg aýmaǵynda ónimi kórshiles shetelderge de shyǵarylatyn ataqty kúnbaǵys maıy zaýyty jumys istep tur. Aýylda 5 zańdy tulǵa, 12 jeke kásipker, 11 sharýa qojalyǵy bar eken.
«Aýylda tirkelgen 734 saılaýshymyz bar. Qazirgi jaǵdaıǵa qaraǵanda halyqtyń belsendiligi jaman emes», deıdi №352 saılaý ýchaskesiniń tóraǵasy Erjan Qurmanov.
Bir qyzyǵy, Aqsýat aýylynyń tizginin ustaýǵa nıet bildirgen eki úmitker de buryn bul aýylda turmaǵan, syrttan kelgen azamattar eken. Pandemııanyń órshýine baılanysty saılaýaldy úgit-nasıhat kezeńinde úmitkerler jıyn jasap, aýyl halqymen kezdese almady. Kóp is-shara áleýmettik jeliler arqyly ótti. Okrýgti aralap, pikir ıelerimen, aýyl aqsaqaldarymen, belsendi toptarmen kezdesken keıbir úmitker eldiń esinde qalypty.
«Osy Poıma aýylynda 1996 jyldan beri turamyn. Aýylymnyń bolashaq ákimin saılaýǵa tuńǵysh ret kelip turmyn. Búgingi saılaý uıymshyldyqpen ótip jatqan sııaqty. Eki kandıdattyń bireýin jaqsy tanımyn. Aýyldy aralap, kelip júrgende áńgimesin tyńdap edim. Qolynan is keletin, laıyqty jigit sııaqty. Daýysymdy soǵan berdim», deıdi 71 jastaǵy Qabı Bektenov.
Baıqaǵanymyz, okrýg aýmaǵynda uıaly baılanys, mobıldi ınternet sapasy jaqsartýdy qajetsinip tur eken. Magıstralnyı men Áıtıev aýyldaryna kireberis joldarǵa da jóndeý qajet. Estýimizshe, bul eki aýyldyń kireberis jolyn jóndeýge qajetti 140 mln teńgege bıýdjettik ótinim joldanǵan kórinedi. Poıma aýylyndaǵy bastaýysh mektep ǵımaraty ta kózge qorashtaý kórindi. Munyń bárin el tańdaǵan aýyl ákimi aýdan basshylarynyń aldyna qoıyp, máseleni ońynan sheshse kerek.
«Jergilikti ýaqytpen túski saǵat 11.00-de Batys Qazaqstan oblysy boıynsha saılaýshylardyń 29 paıyzy daýys berdi», dep habarlady Batys Qazaqstan oblystyq saılaý komıssııasynyń tóraǵasy Ǵaısa Qapaqov.
Joǵaryda aıtqanymyzdaı, 31 aýyldyq okrýg ákiminiń ornyna osy saılaýda barlyǵy 81 kandıdat tirkelgen bolatyn. Sonyń ishinde 39 kandıdatty partııalar usynsa, 42-si – ózin ózi usynǵan azamattar eken.
«Saılaý barysynda 11 adam oıynan aınyp, óz kandıdatýrasyn alyp tastady. Búgin saǵat 7-de saılaý ótýi tıis 79 bólimshe esigi aıqara ashyldy, 488 komıssııa múshesi karantın talaptaryn saqtap, halyqqa óz tańdaýyn jasaýǵa kómek kórsetip jatyr. Saılaý ýchastoktarynda 184 adam baıqaýshy bolyp tirkelgen. Onyń 79-y – kandıdattardyń senimdi ókili bolsa, 62 adam– qoǵamdyq uıymdardan, 43 adam – saıası partııalar tarapynan jiberilgen baqylaýshylar», dedi Ǵaısa Qapaqov.
Kúndizgi saǵat 11-degi málimet boıynsha Aqjaıyq aýdanynda – saılaýshylardyń 16 paıyzy, Bókeıorda aýdanynda – 29 paıyz, Bórlide – 23, Báıterek aýdanynda – 34 paıyz, Jańaqalada – 33, Qaztalov aýdanynda – 39, Qaratóbede – 34, Syrymda – 41 paıyz, Terekti aýdanynda – saılaýshylardyń 27 paıyzy daýys bergen. Jalpy oblys boıynsha – 29 paıyz saılaýshy tańdaýyn jasaǵan.
Aıta keteıik, saılaý ýchaskelerindegi qoǵamdyq tártip pen karantındik talaptardyń saqtalýyn qadaǵalap, 130-daı polısııa qyzmetkeri kezekshilik etip júr eken. Batys Qazaqstan oblystyq sanıtarııalyq-epıdemıologııalyq baqylaý departamentiniń basshysy Muhamǵalı Aryspaev pen oblystyq Polısııa departamenti jergilikti polısııa qyzmeti basqarmasy bastyǵynyń orynbasary, polısııa podpolkovnıgi Ernar Sultanǵalıevtiń aıtýynsha, saılaý kezinde zańbuzýshylyq oqıǵa tirkelmegen, bári oıdaǵydaı ótýde.
