– Aýyl ákiminiń saılaýyna saıası partııalardan (Nur Otan – 15, «Aýyl» HDPP – 5, ADAL saıası partııasy – 2, QHP – 2) 24 úmitker usynyldy. О́zin ózi usynǵan úmitkerler sany – 28. Úsh okrýgte 2 (Atyraý qalasynyń Qaıyrshahty, Qurmanǵazy aýdanynyń Safon, Teńiz aýyldyq okrýgteri), 1 okrýgte (Mahambet aýdanynyń Saraıshyq aýyldyq okrýgi) 4, al 14 okrýgte 3 úmitkerden tirkeldi. Saılaý bıýlletenderi jalpy saılaýshylar sanynyń bir paıyzyna artyǵymen daıyndalyp, saılaý okrýgterine, ýchaskelerge jetkizildi, – deıdi Azamat Aımanakýmov.
Onyń aıtýynsha, saılaýshylar tizimine 44 305 saılaýshy engizilgen. Saılaý ýchaskeleri qurylmaǵan 12 eldi mekende daýys berýdi uıymdastyrý máselesi sheshimin tapqan. Eń shalǵaıdaǵy saılaý ýchaskeleri Qurmanǵazy aýdanynyń ortalyǵynan 180 shaqyrym qashyqtyqtaǵy Asan aýyldyq okrýginde ornalasqan.
Atyraý qalasyna taıaý ornalasqan Damby aýylynda ákim saılaýyna jeti úmitker usynylǵanymen, onyń úsheýi ǵana tirkeýden ótti. Sol úsheýdiń birine 1 891 saılaýshy tańdaý jasady. Osyndaǵy Amangeldi atyndaǵy mektepke ornalasqan №68 saılaý ýchaskesindegi saılaý komıssııasynyń hatshysy Mereke Taırovtyń málimetinshe, bul aýylda 3 600-den astam turǵyn bar.
– Saılaý ýchaskesi tańǵy saǵat 7:00-de ashyldy. Saılaý ýchaskesi ashylǵan sátte alǵashqy bolyp aýyldyń 45 jastaǵy turǵyny Albert Mashqalıev ózi tańdaǵan úmitkerge daýys berdi, – deıdi Mereke Taırov.
Aýyldaǵy saılaý ýchaskesinde saılaýshylardyń jasyryn daýys berýi úshin bes kabına ornatylypty. Al múmkindigi shekteýli jandarǵa arnalǵan taǵy bir kabına jabdyqtalǵan. Munda araqashyqtyqty saqtaý jónindegi nusqaýlyqtar ilingen. Saılaý ýchaskesiniń kireberisinde saılaýshylardyń dene qyzýy ólshendi. Sodan soń saılaýshylar Ashyq júıesindegi QR kod arqyly ótti. Saılaýshylar daýys bergen soń basqa esik arqyly syrtqa shyqty.
– Biz saılaý ýchaskesine kele almaıtyn, múmkindigi shekteýli nemese egde jastaǵy turǵyndar úshin arnaıy ókildi úıine jiberip, daýys berýine múmkindik jasadyq. Sondaı saılaýshylardan 36 ótinish tústi. Túski saǵat 12-ge deıin turǵyndardan túsken ótinishter jınaqtalyp, jyljymaly daýys berý sharalary uıymdastyryldy, – deıdi M.Taırov.
Bul aýylda daýys berýge otbasymen kelgender de bar. Solardyń qataryndaǵy mektep muǵalimi Botagóz Madaǵaeva jubaıymen, ata-enesimen birge tańdaýyn jasady.
– Mektepte muǵalim bolyp jumys isteımin. Osynda turatyn bolǵandyqtan, aýyldyń bolashaǵyna beıjaı qaraı almaımyz. Aýylymyz órkendep, turǵyndardyń ál-aýqaty jaqsarǵanyn qalaımyz. Bizdiń aýylda belsendi jastar kóp. Olar ashyq alańda ártúrli sporttyq týrnır uıymdastaryp, jas býynnyń, ásirese mektep oqýshylarynyń salamatty ómir saltyn ustanýyna atsalysyp júr. Jas volonterler qaıyrymdylyq aksııalaryn ótkizip, turmysy tómen otbasylarǵa baspana men azyq-túlik sebetin syılap keledi. Aýyl ákimi qazaqtyń qaıyrymdylyq qaǵıdasyn ónegeli isimen dáleldep júrgen osyndaı belsendi jastarǵa qoldaý bildirse, turǵyndardyń aýyzbirshiligi nyǵaıyp, jaman ádetten arylǵan bolar edi, – dep óz pikirin bildirdi Botagóz Madaǵaeva.
Medısına salasynda jumys istep, zeınetkerlikke shyqqan Maqpal Temirovanyń pikirinshe, aýyl adamdarynyń baıyrǵy kásibiniń qatarynda egin egý men tórt túlik ósirý bar. Alaıda egin sharýashylyǵyn damytýǵa sýdyń jetispeıtini qolbaılaý bolyp otyr. Aýyl ákimi osy máselege den qoısa, aýyldan kóshý toqtap, jastar arasyndaǵy jumyssyzdyqty azaıtýǵa yqpaly tıedi. Al balabaqsha qyzmetkeri Aıman Musaevany balalar oınaıtyn alańnyń joqtyǵy alańdatady. Degenmen osy máseleniń úmitkerlerdiń baǵdarlamasynan kórinis tapqany úmit otyn mazdatyp otyr.
Atyraý oblysy
