Eni kompanııasy Qazaqstanda 1992 jyldan beri jumys istep keledi jáne el ekonomıkasyna 15 mlrd dollardan astam ınvestısııa saldy.
Taraptar Qashaǵan jáne Qarashyǵanaq ken oryndarynda munaı men kondensat óndirý deńgeıin arttyrý jáne ony saqtaý, sondaı-aq Qazaqstan Respýblıkasynyń aýmaǵynda jańartylatyn energııa kózderi jobalaryn damytý máselelerin talqylady.
Premer-Mınıstr A.Mamın Eni Qazaqstannyń mańyzdy ınvestısııalyq seriktesi ekenin atap ótip, kompanııanyń Qarashyǵanaq jáne Qashaǵan ken oryndaryn ıgerýge, sondaı-aq Isataı jáne Abaı ken oryndarynda barlaý jumystaryn júrgizýge qosqan úlesin atap ótti.
Eni kompanııasy Qazaqstandaǵy energetıka jáne kómirteksizdendirý jobalaryna qomaqty úles qosýda. Osy baǵyt aıasynda birqatar birlesken joba júzege asyrylyp jatyr. Atap aıtqanda, Aqtóbe oblysynda qýaty 100 MVt bolatyn jel elektr stansasynyń qurylysy boıynsha joba iske asyrylýda jáne Túrkistan oblysynda qýaty 50 MVt bolatyn kún elektr stansasynyń qurylysy aıaqtalýda.
Kezdesý barysynda Úkimet basshysynyń qatysýymen birqatar qujatqa qol qoıyldy. Aıtalyq, «QazMunaıGaz» UK» AQ men Eni kompanııasy arasynda elektr energııasyn óndirý jáne iske asyrý úshin energetıkalyq kóshý jobalaryn ázirleýdegi yntymaqtastyq týraly jáne Qazaqstanda aýyl sharýashylyǵy jáne sýtegi jobalaryn damytý týraly memorandýmdarǵa qol qoıyldy.
Sonymen qatar Ekologııa, geologııa jáne tabıǵı resýrstar mınıstrligi, «Qazgeologııa» AQ men Eni kompanııasy arasynda Qazaqstan aýmaǵynda jer qoınaýyn paıdalaný jobalaryn birlesip iske asyrý máseleleri boıynsha yntymaqtastyq týraly memorandýmǵa qol qoıyldy.
