Onyń ústine, jergilikti taksı parkiniń 45 jastaǵy júrgizýshisi buryn joǵalyp ketý sııaqty qylyq kórsetpegen, salmaqty adam eken. Áıeli úsh kúnnen beri úıge kelmedi degen soń polısııa qala aýmaǵyn, onyń ishinde saıajaılardy sektorlarǵa bólip, birneshe toppen izdeýge kirisken. Oǵan krımınaldyq polısııa qyzmetkerleri, ýchaskelik polısııa ınspektorlary, patrýldik polıseıler, 40-tan astam erikti, joǵalǵan azamattyń jaqyndary men áriptesteri tartyldy.
BAQ-qa, áleýmettik jelilerge izdeý jarııalaý jaıly habarlar ornalastyryldy. Izdeýdegi adamnyń sýreti, aıryqsha belgileri kórsetilip, búkil qala jurtshylyǵy qulaqtandyryldy. Mundaıda túrli boljam men qaýeset te órtteı laýlady. «Taǵy da taksısterdi óltiretinder shyǵypty», degen úreı turǵyndardy alańdatýmen boldy.
Kóp ótpeı, áleýmettik jelidegi habarlandyrýdy kórgen adamdardyń biri ony dúkende kórgenin jazypty. Janynda bir adam bolǵan. Sol dúkenge asyǵyp-úsigip jetken polısııa izdeýdeginiń araq satyp alyp jatqanyn, janynda onyń jaqyndary tanıtyn adamnyń bolǵanyn beınekameradaǵy jazbadan kóredi. Al ol kisiniń saıajaıy baryn bilgen soń, polısııa taksıshiniń jaqyndarymen birge barsa... joǵalǵan adam sonda «dem alyp» jatyr eken. О́ziniń búkil qalany dúrbeleńge salǵanynda da jumysy joq, qyzara bórtip, shaljıǵan kúıinde jatqan...
Árıne onyń óz otbasyna habar bermeı, iz-túzsiz ketkeninde bir mán bar sııaqty. Áıeline renjip ketti me, álde taǵy bir sebebi boldy ma? Ol jaǵy belgisiz. Polısııa taýyp bergenine máz, áıeli tabylǵanyna máz bolyp tarasqan.
Osy oraıda bir aıta keterligi, mundaı aıdyń-kúnniń amanynda aıaqastynan joǵalyp-tabylýshylarǵa qatysty jaýapkershilik júkteıtin norma qoldanystaǵy zańnamada múlde qarastyrylmaǵan eken. Qansha jurtty áýre-sarsańǵa salǵan, halyq arasynda shaǵyn bolsa da dúrbeleń týdyrǵan adam sóıtip esh jazasyz ketti. Jeke basy erkin bolsa da árbir adam óziniń qoǵam aldyndaǵy jaýapkershiligin sezinýi kerek qoı. Qazirgideı baılanystyń damyǵan zamanynda qansha ashýlansa da áıeline: «Men amanmyn, izdeme» dese bolýshy edi. Biraq eregistiń saldary bolýy kerek, ondaıǵa taksıshi «seriniń» aqyly jetpegen bolyp shyqty. О́kinishke qaraı, mundaı jaýapsyzdar qoǵamymyzda az emestigi anyq.
