Avtoportret

Halyq sýretshisi Hám keskindemeshi Aısha Ǵalym­baeva esimi elge etene tanys. Týyndynyń aty – «Avtoportret». Sýretshi ulttyq beıneleý ónerine nár bergen jannyń biri. Tipti qazaq keskindemesiniń altyn qoryn quraıtyn qazaq sýretshileriniń alǵashqy býynyna jatady. Bulaı salmaq artyp otyrǵan sebebimiz, ol – Qazaqstannan shyqqan alǵashqy áıel sýretshi.

Avtor ózi jetik bilgen arab tilindegi mátinder arqyly da qazaqtyń ulttyq kıimin egjeı-tegjeıli zerttep, sýretterin salyp, júıelegen. Almaty kórkem jáne hronıkaly fılmder kınostýdııasynda jumys isteı júrip, «Abaı ánderi», «Mahabbat poemasy», «Qyz ben jigit», «Bul Shuǵylada bolǵan», «Onyń ýaqyty keledi» kınolentalaryna eskızder jasady.

Avtoportret – ónerde eń kúrdeli hám erekshe janr. Eger basqa baǵytta jumys isteıtin keskindemeshi kenep betine syrtqy zattardy muqııat zerdelep, jet­kizýge tyrysatyn bolsa, al avtoportret salǵan sýret­shi nazaryn óziniń jan dúnıesine aýdaryp, ózin ózi tereń zertteýine týra keledi.

Avtoportretti kásipshilik sanatqa jatqyzýǵa bolady. Aısha Ǵalymbaeva óziniń sýretshi ekenin tanytyp, palıtra jáne qylqalam ustap turǵan sátin jazady. Sýretshiniń basy azdap bir jaǵyna burylǵan ári nazaryn alysqa qadap tur. Bul onyń qııalǵa berilgen nurly sáti.

Kartınada tańba men tús basymdyqqa ıe. Ol qanyq ashyq tústerdi jalpaq, erkin áserli jaǵý arqyly jazǵan. Artqy plan joramalmen alynǵan. Sýretshiniń sul­basy qyzyl jáne qyzyl-sary tústerdiń kóme­gimen basym túsedi. Sulbanyń jazyq sheshimi jáne usaq-túıektiń bolmaýy shyǵarmany mazmundy ári tul­ǵaly etip tur.

Jyly jáne sýyq tústerdiń qarama-qaıshylyǵy emosııalyq tolqýdyń keń spektrin berýde. Nazaryn syrtqa salǵan, júzinde azdaǵan jymıys bar kartınada qandaıda bir qupııa bardaı. «Sýretshi qaıda qarap tur?» «Ne oılap otyr?», «Neni aıtqysy keldi?», mine, osy saýaldar adamǵa oı tastaıdy.