KVI boıynsha epıdemıologııalyq ahýal sońǵy aptada aıtarlyqtaı nasharlady. 23 shildeden bastap KVI-di kúndelikti tirkeý 1 myń jaǵdaıdan asty. Eger 23 shildede 1 080 jaǵdaı tirkelse, 27 shildede tirkelgeni – 1 250. Jyl basynan beri KVI jaǵdaılarynyń jalpy sany 75153 bolsa, al shildeniń basynan beri 16911 jaǵdaıǵa jetti.
Apta ishinde naýqastar sany 1,2 esege ósti – 5483 jaǵdaıdan 6818-ge deıin, táýliktik ósim 1,3%-dy qurady. Sımptomdy naýqastardyń úles salmaǵy baıaýlap, 90% deńgeıinde qaldy. Osylaısha, shildede bazalyq ssenarıı boıynsha boljanǵan 27,5 myń jaǵdaı tirkelip epıdemıologııalyq jaǵdaı rastaldy.
Almaty qalasynyń turǵyndaryn vaksınalaýmen qamtý 27 shildedegi jaǵdaı boıynsha I komponentti alǵandar 49,9%, II komponentti alǵandar – halyqtyń resmı sany boıynsha 33,6%-dy qurady. Alaıda, bul COVID-19 «delta» nusqasynan týyndaǵan epıdemııanyń kezekti tolqynyn turaqtandyrý úshin áli de jetkiliksiz.
Sonymen qatar, sońǵy 2 aptadaǵy jas quramyny taldaý mynany kórsetedi, 1 jasqa deıingi balalar dertiniń ósýi jalǵasýda – 0,3%, 2,8% quraıdy. О́tken aptada 135 bala dertke shaldyqsa qazir olardyń sany - 178 balaǵa artty. KVI derti 20-dan 40 jasqa deıingi azamattar arasynda – 38%, 40-59 jasta – 25% jáne 60 jastan asqan adamdarda - 20%-ǵa basym.
Osyǵan oraı, B. Saǵyntaev almatylyqtar men qala qonaqtaryn KVI-ge qarsy ekpe alyp, saqtyq pen jaýapkershilik tanytýǵa shaqyrdy. Tek ekpe alý arqyly ǵana ómirimiz ben densaýlyǵymyzdy saqtaı alamyz. Eń bastysy, vaksınalanǵan qalalyqtar ózderiniń jaqyndary men aınalasyndaǵylardyń – dostarynyń, áriptesteri men tanystarynyń qaýipsizdigin qamtamasyz etedi.
