«Turmystyq zorlyq-zombylyq profılaktıkasy týraly» Zań qabyldanǵan 12 jyldyń ishinde bul qujatqa 12 ret ózgerister men tolyqtyrýlar engizilgen eken. Al ótken jyldan bastap Memleket basshysynyń tapsyrmasymen turmystyq zorlyq-zombylyq úshin jaýapkershilik taǵy kúsheıtildi. IIM ókiliniń málimdeýinshe, jyl basynan beri polısııa qyzmetkerleri 47 myńnan astam qorǵaý nusqamasyn shyǵarsa, taǵy 6 myńǵa jýyq otbasy tıranyna sot arnaıy talaptar belgilegen.
Turmystyq zorlyq-zombylyqtyń kóbine-kóp jasyryn sıpatta bolatynyn aıtqan spıker ádette áıelderdiń otbasyndaǵy daý-janjaldy syrtqa shyǵarmaı, ishte tumshalap, jasyryp qalatynyn jetkizdi. «Otbasylyq tırannyń ozbyrlyǵynan qorǵaný úshin olar tipti polısııaǵa da barǵysy kelmeıdi», dedi A.Mılıýk.
Elimizde turmystyq zorlyq-zombylyqqa qarsy kúres kúsheıtildi, zań talaptary da qatańdatyldy. Alaıda zańdyq turǵydan osyndaı ádisterdi belsendi qoldaný ekinshi bir máseleni týyndatyp otyr. Sońǵy ýaqytta elimizde ajyrasý kóbeıip ketken. Statıstıkaǵa sáıkes, 2020 jyly elimizde 14700 otbasylyq jup ajyrassa, olardyń deni – 1 jyldan 4 jylǵa deıin ǵana nekede bolǵandar. Al 2300 shańyraq tipti bir jylǵa jetpeı shaıqalǵan.
«Mundaı jaǵdaı eldegi tiri jetimder qataryn qalyńdatyp, tolyq emes jáne az qamtylǵan otbasylar sanynyń artýy, alıment tóleýden jaltarǵan jaýapsyz áke sekildi onsyz da kúrmeýi qıyn áleýmettik máselelerdi kúrdelendirip otyr», degen spıker turmystyq zorlyq-zombylyqty bógeý úshin, eń aldymen, oǵan jol beretin sebepterdiń aldyn alý kerek ekenin tilge tıek etti. Osyǵan oraı Ishki ister mınıstrliginiń ókili: «Jaqyndaryna kúsh kórsetetin quqyq buzýshylarmen de, zorlyq-zombylyq qurbandarymen de keshendi ońaltý jáne psıhokorreksııalyq jumystar júrgizýge bet burýymyz qajet», dedi.
«Turmystyq zorlyq-zombylyq pen ajyrasýdyń aldyn alýda otbasylyq qundylyqtardy arttyryp, salamatty ómir saltyn ustanýdyń mańyzy zor. Osyǵan oraı IIM qazirgi ýaqytta depýtattyq korpýspen birlesip quqyq buzýshylar úshin ońaltý baǵdarlamalaryn engizý máselelerin jan-jaqty qarastyrý ústinde. Al bul bastamalardy otbasy ınstıtýtyn nyǵaıtýdyń jekelegen máseleleri boıynsha zań jobasy sheńberinde iske asyrý josparlanyp otyr», degen vedomstvo qyzmetkeri otbasyndaǵy zorlyq-zombylyqtyń aldyn alý úshin úkimettik emes uıymdardyń áleýetin tıimdi paıdalaný kerektigin de atap ótti. «Mundaı uıymdar turmystyq zorlyq-zombylyq qurbandaryna baspana berip qana qoımaıdy, olarǵa quqyqtyq, medısınalyq, áleýmettik, sondaı-aq psıhologııalyq turǵydan kómek kórsetedi, trenıngter men konsýltasııalar ótkizedi», degen A.Mılıýk óz shańyraǵynda erinen zorlyq kórip, zombylyqtyń qurbany bolǵan kez kelgen jan osyndaı uıymdarǵa júgine alatynyn, bolmasa polısııa qyzmetkerleriniń tikeleı kómegimen daǵdarys ortalyqtaryna ornalasa alatyndyǵyn aıtty.
Al búginde elimiz boıynsha 49 daǵdarys ortalyǵy jumys istese, onyń 39-y arnaıy baspanamen qamtamasyz etilgen. Bıyldyń ózinde polısııa qyzmetkerleri otbasynan jylý tappaı, taıaqqa jyǵylyp, qıyn jaǵdaıǵa tap bolǵan 3 myńnan astam áıeldi daǵdarys ortalyqtaryna ornalastyrǵan.
