Fransýzdyq Carmat kompanııasy jasaǵan bıoprotez júrek osyǵan deıin AQSh-taǵy klınıkalyq zertteýlerde salynǵan. Al bul joly ónim alǵash ret satylyp, qoldanysqa endi.
2020 jyldyń jeltoqsanynda Carmat qurylǵyny júrek jetispeýshiliginiń sońǵy kezeńindegi naýqastarǵa júrek transplantasııasynyń kópiri retinde satýǵa EO-dan ruqsat alǵan. Qurylǵy bıologııalyq jáne sıntetıkalyq materıaldardan jasalǵan. Neapol aýrýhanasynyń júrek hırýrgııasy bóliminiń dırektory Marısa De Feonyń aıtýynsha, Carmat kompanııasynyń jańa jasandy júregi osyǵan deıin ornatylǵan SynCardia Systems modelinen jaqsyraq.
«Osy ýaqytqa deıin biz SynCardia-nyń ónimin qoldandyq, ol – ishinde tórt mehanıkalyq klapany bar tolyq mehanıkalyq jasandy júrek, al Carmat usynǵan ónimde tórt bıologııalyq klapan bar», dedi dáriger. Maman olardy basqarý áldeqaıda jeńil ekenin aıtady. «Birinshiden, ol qatty daýys shyǵarmaıdy. О́zge qurylǵylardyń shýly bolýy úlken kemshiligi edi. Onyń bıologııalyq klapandary dekoagýlıasııany qajet etpeıdi, bul óz kezeginde tromboz men qan ketý qaýpin tómendetedi», dep atap ótti Marısa De Feo.
Bolashaqta bıonıkalyq júrekter paıda bola ma degen suraqqa ıtalııalyq maman aldaǵy jyldary ınnovasııany damytyp, ımplantasııa salasynda úzdikterdiń biri bolamyz degen senim bildirdi.
