Aýylǵa baryp jumysqa turyp, birjola sonda ómir súrýge táýekel etken jas mamandarǵa kóterme járdemaqy men baspana alý úshin bıýdjettik nesıe beriledi. Baǵdarlamanyń jastarǵa paıdasy tıetin osyndaı utymdy tustary kóp bolǵanymen, ázirshe oǵan qatysyp jatqandar onsha kóp emes ekenin de aıta ketý kerek.
Alǵashqylardyń biri bolyp dıplommen aýylǵa attanǵan jastyń biri – Aqmaral Ismadıarova. Búginde ol Naýyrzym aýdanyndaǵy Dámdi aýyldyq okrýginde bas maman qyzmetin atqaryp júr.
– Aýylǵa baryp jumys istegisi keletin jastardy yntalandyratyn memlekettik baǵdarlamanyń bar ekenin burynnan biletinmin. Biraq baǵdarlamanyń memlekettik qyzmetshilerdi qamtıtynyn byltyr ǵana áleýmettik jeliden oqydym. Mundaı múmkindikti jiberip alýǵa bolmaıdy, birden qajetti qujattarymdy jınastyryp, Halyqqa qyzmet kórsetý ortalyǵyna ótinish tapsyrdym. Kóp keshikpeı Dámdige joldama berildi. Munda kele salysymen kóterme járdemaqy aldym, – dedi jas maman.
«Dıplommen – aýylǵa!» baǵdarlamasy áý basta densaýlyq, bilim, sport pen mádenıet jáne aýyl sharýashylyǵy salalaryna jas mamandardy kóptep tartý maqsatynda qabyldanǵan. Byltyr bul mamandardyń qataryna memlekettik qyzmetshiler de qosylǵandyǵy durys sheshim bolyp otyr.
– Shynynda da, bizdiń óńir, ásirese, aýyldyq eldi mekender kadr tapshylyǵyn qatty sezinip otyr. Mysaly, Naýyrzym, Altynsarın, Uzynkól aýdandarynda mamandar jetispeıdi, – dedi oblystyq Memlekettik qyzmet isteri jónindegi departamenttiń basqarma basshysy Álııa Ospanova.
Atalǵan joba boıynsha aýylǵa jumysqa kelgen jas mamandardyń árqaısysyna 250 myń teńgeniń ústinde kóterme járdemaqy jáne 4 jarym mln teńge shamasynda baspana nesıesi beriledi.
Qostanaı oblysy
