Sársenbide bastalǵan apat ormandy, eldi mekenderdi sharpyp, endi úlken kýrorttarǵa jetken. El bıligi azamattardy evakýasııalaýǵa májbúr boldy. Aýyl sharýashylyǵy jáne orman mınıstri Bekır Pakdemırlı senbide tirkelgen 98 órttiń 88-i sóndirilgenin habarlady.
Qatty jeldiń áseri men aýa temperatýrasynyń joǵarylaýynan tilsiz jaýdy baqylaýǵa alý múmkin bolmady. Manavgat qalasynda 5 kisiniń, al Marmarıste 1 adamnyń órtte kúıip, qaza bolǵany málim boldy. Eki qala da – Jerorta teńizine jaqyn ornalasqan týrıstik meken.
Densaýlyq saqtaý mınıstri Fahrettın Koja bir ǵana Manavgattaǵy órtten 400 adam zardap shekti dep habarlady. Olardyń 10-y áli de em qabyldap jatyr. Al Marmarıste 159 adamnyń densaýlyǵyna zaqym kelgen. 1 adam kúıik shalyp, aýrýhanaǵa jatqyzyldy.
Hataı qalasyna jetken órt te qatty jeldiń saldarynan baqylaýdan shyqqan. Onyń ústine tilsiz jaý adam kóp shoǵyrlanǵan oryndarǵa deıin jetken.
Túrkııa buqaralyq aqparat quraldary Egeı teńiziniń jaǵasynda ornalasqan Bodrýmdaǵy qonaqúı turǵyndary da evakýasııalaýdy suraǵanyn jazady. Olardy qutqarý úshin jeke ıahtalar men kemeler shaqyrylǵan.
О́rt bolǵan jerlerdi prezıdent Erdoǵan tikushaqpen aralap shyqty. Odan keıin ol aımaqtardy resmı túrde apatty aımaq dep jarııalady.
«Halyqty qutqarý úshin qajet sharalardy, qoldan kelgenniń bárin isteımiz. Azamattardyń shyǵynyn jabý, múmkindikterin arttyrý josparlanyp otyr», dedi memleket basshysy.
Túrkııanyń ońtústigindegi Manavgat qalasynda ótken baspasóz máslıhatynda Erdoǵan Ankara oqıǵany saıasattandyrýǵa tyryspasa da, ádeıi uıymdastyryldy degen nusqany da joqqa shyǵarmaıtynyn jáne órttiń sebepterin anyqtaý úshin tergeý júrgizilip jatqanyn aıtty. «Biz órttiń sebepterin muqııat zertteımiz. Eger óz Otanyn órteýge tyrysqan satqyndar bolsa, olar eń aýyr jazaǵa tartylady», dedi Túrik eliniń basshysy.
Túrkııa buryn oryn alǵan orman órtterinde «Kúrdistan jumysshy partııasy» men basqa da tyıym salynǵan toptardy aıyptaǵan edi.
Erdoǵan úkimetten úılerin nemese aýylsharýashylyq jerlerin joǵaltqan otbasylarǵa ótemaqy tólenetinin habarlady. Onyń aıtýynsha, zardap shekkenderge salyqtar, áleýmettik qamsyzdandyrý jáne nesıe tólemderin keshiktirip tóleýge ruqsat berilip, shaǵyn bızneske nóldik paıyzdyq nesıeler usynylady.
«Qaıtys bolǵandarǵa Qudaıdyń raqymyn tileýden basqa eshteńe isteı almaımyz, biraq biz órtengen dúnıeni basqamen almastyra alamyz», dedi ol.
Erdoǵan órtpen kúresetin ushaqtardyń sany 6-dan 13-ke deıin jetkizilgenin málimdeı kele, Ýkraına, Reseı, Ázerbaıjan jáne Irannan ushaqtar jiberilgenin jáne myńdaǵan túrik áskeri, sondaı-aq ondaǵan tikushaqtar men qashyqtan basqarylatyn ushaqtar órt sóndirýge jumyldyrylǵanyn aıtty.
Qazaqstan basshysy Qasym-Jomart Toqaev Túrkııada bolǵan alapat órt saldarynan eldiń ekonomıkasy men týrıstik bazasyna orasan zor shyǵyn kelgenine jáne azamattardyń densaýlyǵyna aýyr zardabyn tıgizgenine baılanysty Túrkııa prezıdenti Rejep Taııp Erdoǵanǵa nıettestik bildirgen jedelhatyn joldady. Sonymen qatar baýyrlas halyqqa gýmanıtarlyq kómek kórsetýge daıyn ekenin atap ótti.
Buqaralyq aqparat quraldary Túrkııa polısııasy Manavgat qalasynda orman órtine qatysy bar degen kúdiktilerdi ustaǵanyn habarlady. Quqyq qorǵaý organdarynyń aıtýynsha, kúdiktilerdi jergilikti turǵyn baıqap qalǵan. «Azamattar kúdiktini sotqa berýdi talap etti», dedi Syrtqy ister mınıstri Mevlıýt Chavýshoglý.
Prezıdent tergeý isine barlaý qyzmetkerlerin de jumyldyryp, úlken zardap ákelgen órt sebebin jedel anyqtaýdy tapsyrdy.
