Bar tileýimiz – osy úsh qazaq balýany da bıik minberge shyqsa eken dep edik, átteń ondaı tarıhı sát buıyrmady. Negizi úsheýiniń de júlde alatyn múmkindigi bar edi. 60 kılo salmaqta beldesken bizdiń Meırambek Aınaǵulov álem chempıonatynyń kúmis (2017) jáne qola júldegeri (2019), О́zbekstan atynan kúresken Elmurat Tasmuratov – Rıo Olımpıadasynyń qola medaline ıe bolǵan, álem chempıonatynyń úsh dúrkin júldegeri jáne Azııanyń bes dúrkin jeńimpazy atanǵan balýan.
Al mıllıardtyń arasynan julqynyp shyqqan Qytaıdyń úzdigi Ýálıhan Serik (Saılıkke) álem chempıonatynyń qola júldegeri. Ýálıhan Serikke áli de júlde alýǵa múmkindik bar. Ol ekinshi aınalymda japon balýanymen kúresip, tóreshiler bolmashy upaımen jeńisti japondyqqa berip jiberdi. Al óz kezeginde japon balýany fınalǵa shyqsa, Ýálıhan qola medal úshin talasqa túsedi.
Pandemııaǵa baılanysty bizge sportshylarmen sóılesýge bolmaıdy. Tipti ózge eldiń sportshylaryna da suraq qoıa almaısyń. Soǵan qaramastan beldesýden keıin júgirip júrip Ýálıhanǵa suraq qoıyp úlgerdik. «Ýaǵaleıkúmassalam, qýanyshtymyn aǵa. Aǵa, men jeńilgen joqpyn, barlyǵyn ózderińiz kórdińizder ǵoı», dedi balýan sportshylar jaıǵasatyn jerge bara jatyp.
