Qylmystyq isti Qaraǵandy oblysynyń Qylmystyq ister jónindegi mamandandyrylǵan aýdanaralyq sotynyń sýdıasy Qaırat Qasymov qarady. Sottalýshy QR QK-nyń 99-baby 1-bóligi «Adam óltirý» boıynsha sotqa tartyldy. Sot ony kináli dep tanyp, 11 jylǵa bas bostandyǵynan aıyrý jazasyn qatań rejımdegi mekemede óteýge úkim shyǵardy.
«2020 jyldyń 20 tamyzynda Shahtınsk qalasynda sottalýshy dostarymen birge avtovokzal artyna Ivan Tasıdy buryn bolǵan kelispeýshilikti sheshý úshin shaqyrǵan. Sol tóbeles kezinde Ivan pyshaqtalǵan. Sottalýshy pyshaǵyn joldyń boıyna laqtyryp, oqıǵa ornynan qashyp ketti. Onyń kinási aıǵaqtarmen, beınejazbalarmen jáne sot-medısınalyq saraptamalarmen dáleldendi», dedi Qaraǵandy oblystyq qylmystyq izdestirý basqarmasynyń baspasóz qyzmetindegiler.
Aıta keteıik, QR QK-nyń 99-babynyń sanksııasy boıynsha 8 jyldan 15 jylǵa deıin bas bostandyǵynan aıyrý jazasy qarastyrylǵan.
«Sottalýshy buryn qylmystyq jaýapkershilikke tartylmaǵan. Ol jasaǵan isine ókingen joq. Sondyqtan, ol qatań tártiptegi qylmystyq-atqarý júıesi mekemesinde jazasyn óteı otyryp, 11 jylǵa bas bostandyǵynan aıyryldy. Sot úkimi zańdy kúshine engen joq», dedi sot.
Eske salaıyq, 2020 jyldyń 20 tamyzyna qaraǵan túni Shahtınsk qalasynyń ortalyq aýrýhanasyna pyshaq jaraqatymen 24 jastaǵy qala turǵyny jetkizilgen. Jas jigit es-tússiz jatqan. Dárigerler barlyq kúsh-jigerlerin salǵanyna qaramastan jigitti aman alyp qala almady. Keıin marqumnyń kásipqoı bokspen aınalysqany belgili boldy. Ony óltirdi degen kúdikpen Shahtınsk qalasynyń 22 jastaǵy turǵyny ustaldy. Qaıtys bolǵan adam men ustalǵan jigit buryn dos bolǵan.
