Energyprom málimetinshe, aýyl, orman jáne balyq sharýashylyǵy salasynda eńbek qylatyn kásiporyndar sany 8 jyl qatarynan kóbeıip otyr eken. Árıne, bul – ári tańǵalarlyq, ári qýanarlyq qubylys. Bıyl ondaı kásiporyndar sany 15,3 myńǵa jetken. Onda jumys isteıtin adam sany 69 myńnan asady. Bul – birinshi toqsannyń sońyndaǵy kórsetkish. Olardyń kóbi, 56 myńnan asa adam negizinen ósimdik jáne mal sharýashylyǵy, ańshylyq jáne qyzmet kórsetý salasynda kásip etip, kún kóredi eken. Taǵy 2 myńdaı adam orman jáne aǵash kesýdiń aınalasynda mańdaı terin tógip júr. Aýyl sharýashylyǵynyń mamandary ásirese Soltústik Qazaqstan, Aqmola jáne Qostanaı oblystarynda kóp. Al osy saladaǵy ortasha jalaqy birinshi toqsanda 116,1 myń teńgeni quraǵan. Bul eldegi ortasha jalaqy kórsetkishinen eki ese tómen.
«Qazaqstan Respýblıkasynda sońǵy jylda jalaqy 15,2 paıyzǵa ósti, al aýyl, orman jáne balyq sharýashylyǵy salasyndaǵy jalaqy nebári 10,4 paıyzǵa ǵana kóbeıdi. Bul saladaǵy jalaqynyń satyp alý qabiletiniń ósimi 2,9 paıyzdy quraǵan. Onyń ózinde satyp alý qabiletiniń ósimi tek qana ósimdik jáne mal sharýashylyǵy salasynda ǵana baıqalyp otyr. Aýyl sharýashylyǵyndaǵy eń joǵarǵy ortasha aılyq jalaqy orman jáne aǵash kesý salasynda baıqalady – 127,3 myń teńge», dep jazady Energyprom.
О́simdik jáne mal sharýashylyǵynda, ańshylyq pen qyzmet kórsetý salalaryndaǵy azamattar ortasha mánde 115,9 myń teńge alsa, balyq jáne akvamádenıet salasynda eńbek etýshiler 81,1 myń teńgeni qanaǵat tutady.
Dál qazirgi kezeńde aýyl sharýashylyǵy – kúıreýdiń az-aq aldynda turǵan, eleýli kómek pen qoldaýdy qajet etetin sala. Úkimet sózine sensek, salaǵa qarjy jetýdeı-aq jetip jatyr. Naqtylaǵanda – ınvestısııa. 2021-diń qańtar-mamyrynda salanyń negizgi kapıtalyna kelgen ınvestısııa 213,8 mlrd teńgeni quraǵan. Finprom dereginshe, bul byltyrmen salystyrǵanda 47 paıyzǵa kóp. Osy aıdyń basynda Premer-Mınıstr Asqar Mamın de sharýashylyqtarǵa iri kólemde qarjy beriletinin basa aıtqan.
«Bıyl aýyl sharýashylyǵyna 700 mlrd teńgeden astam ınvestısııa salynady. Tamaq ónimderi óndirisine beriletin ınvestısııa da 18,8 paıyzǵa artyp, 124 mlrd teńgege jetedi. Qazir jalpy somasy 335 mlrd teńge bolatyn 285 ınvestısııalyq joba júzege asyp jatyr. Atalǵan shara 8,4 myń jumys ornyn qurýǵa múmkindik beredi», degen edi Úkimet basshysy.
Memleket aýyl sharýashylyǵyn qoldaýdyń taǵy bir tetigi retinde aýyl sharýashylyǵyn qoldaý qarjylyq qoryn qurǵan edi. Qor dırektory Ámirhan Smaılulynyń aıtýynsha, qor mal sharýashylyǵyn damytý úshin 16 paıyzben 30 mln teńge nesıe beredi. Qoldau.kz baǵdarlamasy arqyly syıaqy stavkasyn arzandatý maqsatynda sýbsıdııa rásimdeýge bolady. Sonda 10 paıyzy sýbsıdııa esebinen qaıtarylady da, sharýashylyq ıesi 6 paıyzdy ǵana tóleýge múmkindik alady.
Qazaqstannyń keń-baıtaq dalasy, ejelden ańshylyq pen malshylyqqa degen ıkemdiligi, ósimdik pen dala tabıǵatynyń qyr-syryn meńgergendigi – aýyl sharýashylyǵyn damytýǵa qajetti faktorlar. Dese de damý úshin bul faktorlar azdyq eteri sózsiz. Memlekettiń tıimdi qoldaýy qajet. Sala qashan aıaǵynan tik turyp ketkenshe.
