Kókireginiń kómbesine kóz salsań tym kúńgirt. Jandy ýatady, kóńildi alasapyran etetin kúshke ıe. Kartınada júrekti qazaqtyń júzi menmundalap tur. Týyndynyń taqyryby – «Aqynnyń basy». Avtory – tanymal sýretshi Amandos Aqanaev. Tuıǵyn minezdi talanttyń kenep betindegi keskini jigerińdi qaıraıdy. Muny jasyrý múmkin emes.
Bul kartınany psıhologııalyq portret janryna jatqyzýǵa ábden bolady. Kórkem portret adamnyń ishki álemin jáne kúızelisin, adamı sezimderi men áreketterdiń alýan túrliligin kórsetýge, onyń tulǵasyn shynaıylyqpen jetkizýge arnalǵan. Sýretshi óz týyndysynda Halyq jazýshysy, dańqty aqyn, qoǵam qaıratkeri Oljas Súleımenovti beınelegen.
О́tken ǵasyrdyń aıaǵynda sýretshi Amandos Aqanaev óz sheberhanasynda aqyn Oljas Súleımenovpen kezdesedi. Qaısar qalamgerdiń «Qysh kitaby» sýretshiniń eń súıikti shyǵarmasynyń biri bolatyn. Qalamger men qylqalam sheberiniń júzdesýi úlken dostyqqa ulasady. «Az ı Iа» kitaby shyqqannan keıin aıbarly aqyn SOKP saıası bıýrosynyń, ǵylymdaǵy sheneýnikter men generaldardyń qýǵynyna tústi. Áıtse de aqyn sol almaǵaıyp zamanda kóne túrkilik órkenıettiń mańyzyn, onyń uly mádenıetin jáne kóneden búginge deıingi jalpy álemge áserin baıandap, tarıhı ádildikti qalpyna keltirdi. Mine, sýretshini shabyttandyrǵan sol erlik-tuǵyn.
Avtor óz týyndysynda ekspressıonıst-sýretshilerge tán kenetten synǵan syzyqtar, qarama-qaıshy túster, abstraktili pishinder, asyrý jáne jeńildetý syndy amaldardy qoldanady. Keıipkeriniń minezin jetkizý úshin tústerdiń sımvolıkasyn paıdalanady. Ol modeline qyzyl tústi jeıde kıgizedi. Sebebi qyzyl tús kórkem ónerde – batyldyqty, qýatty, tabandylyqty, adamgershilikti, bılikti, soǵysty hám qandy bildiredi. Portretke jan bitirý úshin Súleımenovti kók fonǵa ornalastyrady. Munda kók tús – namystyń, adaldyqtyń, shynaıylyqtyń jáne minsizdiktiń túsi.
Ashyq qyzyl tústi jeıde men qoıý shashtyń qarama-qaıshylyǵy, ıaǵnı jaryq pen kóleńkeniń antonımi kartına keıipkeriniń minezi men emosııalyq ahýalyn kórsetedi. Sulbalardyń ashyqtyǵy, boıaýlardyń aıqyn jaǵylýy, tústerdiń qarama-qaıshylyǵy ómirdiń ıllıýzııasy men qozǵalysyn jasaıdy. Qarańyzshy, aqyn Oljas Súleımenov bizdiń kóz aldymyzǵa qaıratker-aqyn, shyndyq jolyndaǵy kúresker, ómirlik pozısııasy belsendi adam retinde elesteıdi. Onyń taý tulǵasy asqaq jazylǵan.
