Maldyń qysqy azyǵyn daıyndaý naýqanyn bastap ketken óńir sharýalary bıyl pishen túsiminiń ótken jyldarmen salystyrǵanda áldeqaıda mol bolatynyn aıtyp otyr. Oblystyq aýyl sharýashylyǵy basqarmasy basshysy orynbasarynyń mindetin atqarýshy Ertaı Qýanbaevtyń bergen málimetine súıensek, bıyl topyraq qabatynyń ylǵalyn, jaýyn-shashyn túsimin eskergen óńir sharýalary 2 490 tonna shóp shabýdy josparlap otyrǵan kórinedi.
– Osy jyly shabyndyqtar men tabıǵı jaıylymdardan pishenniń josparlanǵan túsimi gektaryna jeti sentnerden bolady dep boljap otyrmyz. О́tken jyly bul kórsetkish gektaryna 6,9 sentnerdi quraǵan bolatyn. Al egistikterde ósirilgen birjyldyq shópterden pishenniń josparlanǵan túsimi gektaryna 14,1 sentnerdi quraıdy dep boljanýda. Byltyr bul kórsetkish gektaryna 16,5 sentnerdi quraǵan edi. Sonymen qatar egistikte ósirilgen kópjyldyq shópterden pishenniń túsimi gektaryna 21,3 sentnerden bolady dep otyrmyz. Bul kórsetkish ótken jylǵy deńgeıde qalyp otyr, – deıdi E.Qýanbaev.
Bıyl óńirdegi sharýashylyqtardyń shóp shabý naýqanyna degen daıyndyǵy – 100 paıyz. Statıstıkalyq derekterge súıensek, oblys boıynsha shóp shabý naýqanyna 1 700-ge jýyq sharýashylyq jumyldyryldy. Jalpy sany 38,5 myń aýyl sharýashylyǵy tehnıkasy shóp shabýǵa shyqsa, onyń 17 myńy traktorlar, al qalǵany – jemshóp jınaıtyn kombaındar, shóp shapqyshtar, júk kólikteri men basqa da tehnıkalar.
Alaıda sharýa qojalyqtary basshylarynyń aıtýynsha, bıyl shóp suıyq. Byltyrǵydaı qor joq kórinedi. Máselen, kókpektilik sharýalar qyrnap-tyrnap qystyq azyqty daıyndaǵan. Artylsa, aýyl turǵyndarymen bólisedi.
– Bıyl shabyndyq eshkimdi qýanta qoıǵan joq. О́ńirdegi keıbir sharýa qojalyqtarymen ózara almasý nátıjesinde ǵana biz qajetti mal azyǵyn jınap aldyq. Jońyshqa pishenge shabyldy, saban oramǵa oralady. Sebebi ózimizdi ǵana oılamaı turǵyndarǵa da kómek berýimiz kerek. Jemshóbi múldem joq jandarǵa qalaı da kómek qolyn sozý qajet. Biraq ókinishke qaraı, jyldaǵydaı halyqqa shóp satý bıyl múmkin emes. Keıbir jerdi turǵyndar ózderi shaýyp alady, – deıdi «Qalısattaruly» sharýa qojalyǵynyń basshysy Samarhan Jotabaev.
Bul másele Kókpekti aýdanynda ǵana emes, qar qalyń túsetin barlyq aýdanǵa tán. Turǵyndardyń kóbi taýdaǵy buta-qaraǵandy aralap shaýyp júr. Jazdyń alǵashqy aıynda jaýyn-shashyn mólsheri az túskendikten bolsa kerek, shabyndyq kóterile almady. Shóbi belýardan keletin Katonqaraǵaı aýdany da shópten tarshylyq kórip otyrǵany belgili. Demek jemshóp jetkiliksiz bolsa, mal baǵasy da túsip ketýi múmkin. Bul – mal satyp, nápaqa taýyp otyrǵan qarapaıym jurttyń ýaıymy. Kim bilsin, bizdiń jaqta shójeni kúzde sanaıdy. Shóp naýqany áli aıaqtala qoıǵan joq.
Shyǵys Qazaqstan oblysy
