Memleketter basshylarynyń óńirdiń damýy men ózara ıntegrasııasyna qatysty 28 baptan turatyn Birlesken málimdemesi óte qundy. Baýyrlas elder táýelsizdikteriniń 30 jyldyǵy qarsańynda ótken kezdesýde Aral teńizinen bastap, sý máselesi jáne qazirgi jahandy alańdatqan pandemııa da talqylanypty.
Tarıhqa súıener bolsaq, Ortalyq Azııa memleketteri derbes ári táýelsiz jaǵdaıda óz taǵdyrlaryn dál osyndaı formatta talqylamaǵan. Únemi Batys pen Shyǵystyń geosaıası múddesinde turatyn tili, dili, mentalıteti uqsas Ortalyq Azııa elderi zamanaýı syn-qaterlerdi qazirgi kezeńde durys baǵamdaǵan sekildi. Túrki tildes emes jalǵyz el – Tájikstan shekarasyna tirelip toqtaǵan Aýǵanstandaǵy jaǵdaı da aımaqtaǵy onymen shektesetin taǵy bir el – О́zbekstannyń ǵana emes, óńirdegi 70 mln-ǵa jýyq halqy bar ózge elderdiń de ortaq máselesi.
Odan bólek, sońǵy jyldary álemdik arenada túrli bastamashylyq ıdeıalarymen kózge túsetin Qazaqstannan bólek, Ortalyq Azııa elderiniń de tyń usynystar kóterip júrgenin jıi baıqaımyz. Máselen, osy kezdesýde ózbek tarapynyń Birikken Ulttar Uıymy aıasynda Kóliktik-kommýnıkasııalyq ózara baılanysty damytýdyń óńirlik ortalyǵyn qurý týraly bastamasy qoldaý tapty.
Oǵan qosa, memleketter basshylary Tájikstan Prezıdenti E.Rahmonnyń 2025 jyldy Halyqaralyq muzdyqtardy saqtaý jyly dep jarııalaý jáne Muzdyqtardy qorǵaý halyqaralyq qoryn qurý týraly usynysyn da qoldaǵanyn jáne Túrikmenstan Prezıdentiniń Tómen kómirtekti energetıkany damytý jónindegi sharalardy júzege asyrýǵa baǵyttalǵan BUU Strategııasyn ázirleý týraly bastamasyna, sondaı-aq BUU aıasynda energetıkadaǵy basym baǵyttardyń biri retinde sýtegin damytý jónindegi halyqaralyq «Jol kartasyn» qurýǵa qoldaý bildirgenin de aıtqan jón.
Ortalyq Azııa kóshbasshylarynyń Konsýltatıvtik keńesiniń biryńǵaı rámizi týraly da sheshim osy joly sheshilipti. Aldaǵy ýaqytta turaqty túrde ótetin Konsýltatıvtik keńester nátıjesinde aımaqtaǵy eń kúıip turǵan shekara men anklavtar máselesi jáne aýyz sýdy bes el ózara bóliske salǵanda da oń sheshimder qabyldanady dep úmittenemiz.
Oljas BERKINBAEV,
Ortalyq Azııa boıynsha sholýshy
