Jer úıdegi kórshimmen óte sırek kezdesip qaýqyldasatynymyz bar. О́zi dóı jerde, úkimette qyzmet isteıdi. Kóp kórine de bermeıdi. Al keıde aýlasynda shashlyq pisirip shala búlingeninde ymdap meni de shaqyryp alady.
Birde pisirgeninen aýyz tıip otyryp: «Jańa úkimet basshysy qalaı eken?» dep qaldym.
– Páleket fýtbol dese ishken asyn jerge qoıady eken. О́zi de myǵym, qoly qalt etse boldy fýtbol alańynan tabylady. Aq ter, kók ter dińkelegenshe dop tebýden jalyqpaıdy... «Bastyǵyń soqyr bolsa bir kózińdi qysyp otyr» degen, bizde ala dop qýyp alashapqyn bolýdamyz, – dedi.
Sodan aýlasynda ala dop kóbeıip, shaǵyn qaqpa da paıda bolyp, ózi de naǵyz fýtbolshynyń formasyn kıip alyp kúnde tańerteń arsalańdap tarǵyl dopty tebedi de jatady.
Birde úkimet basshysy aýysqan kúnniń ertesinde kórshim dop tebýin kúrt qoıyp damyl tapty.
Kóp ótpeı kórshimniń aýlasy astan-kesteń boldy da qaldy. Baıaǵy dop qaqpasy sypyrylyp, ol alań taqtaıdaı tegistelip, eki-úsh kúnniń kóleminde munda tennıstiń alańy ornap shyǵa keldi... Sóıtsek jańa taǵaıyndalǵan basshysynyń kindigi tennıspen birge jaratylǵan eken... Burynǵy burynǵy ma, bul basshysy kúnine eki márte shuǵyl jınap shar urǵylap shıyrshyq atqyzbasa ishkeni boıyna taramaıtyn kórinedi.
Kórshim kóbine meni ymdap shaqyryp, meni qarsylasy etip quıyn-perin jattyǵady. «Basekeńmen óstip jaqyndasamyz. Táýir oıynshynyń qyzmette de bedeli ósedi» dep ish pıǵylyn aıtyp ta saldy.
Kórshimmen bir mezgil tennıs oınap mende ájepteýir bolyp qalyp edim, bir kúnde bul ermegimiz sap tyıyldy. Sóıtsem, ýaqyty kelip úkimet basshysy aýysatyn bolypty...
Aýys-túıis qys mezgilinde bolǵan. Kóp ótpeı kórshim aıaǵyna shańǵy baılap shytynap shyǵa keldi... Sóıtsek, jańa basshy shańǵynyń shabandozy eken.
Kórshim:
– Páleketti aıaǵyma bala kezde azdap baılaǵan edim, basqa tússe baspaqshyl, qaıta kııýge, erteli kesh úırenýge týra keldi, – dep keıigeni bar.
Ne kerek, balalary súıemeldep, atpen súıretip júrip kórshim kóp ótpeı-aq qatarǵa qosylyp yzǵytyp bara jatady.
Bizder Premer-mınıstr aýystyrýdan álemde aldyńǵy orynda emespiz be, jaz salym kórshim: «Kómegińiz kerek bolyp tur» dep kúmiljıdi. Bilsem – jańa basshysy burynǵylardyń «buralqy qylyǵynan» maqurym, bunyń «ermegi» – maqala jazyp maıyn tamyzý eken. Kórshimniń kúmiljýin qup alyp, mamandyǵymnyń bir qajetine jaraǵanyn mise tutyp, aıda kep kórshime maqala jazýdyń qyr-syryn úıreteıin kep... Ne kerek, beker adam úkimette istemeıdi, bir-eki maqalasyn bastap ta, qyrlap-jonyp ta berip júrip kórshimnen táp-táýir jýrnalıst shyǵaryp aldym.
Burynǵysy bar, bunysy bar, kórshimniń baǵy janyp qyzmetinde ájepteýir joǵarylaý boldy.
Turaqsyz dúnıe, kórshimniń kelmeı ketkeninen úkimettiń taǵy da taıǵanaqtap ketkenin elden buryn sezdim.
Kórshimnen habar-oshar bolmaı tym-tyrys bolyp qarasy da kórinbeı ketken soń aýlasyna aıaq basyp úıine kirsem, kórshim aıaq-basy tańýly tósekte jatyr...
Meni ymdap qasyna otyrǵyzyp, áıteýir tilge bar eken, men suramaı-aq bolǵan jaǵdaıatty baıandaı jóneldi...
Sóıtsem, bizdegi úkimetke kimder kelip, kimder ketpegen, jańa basshysy áperbaqan «óner» ıesi bolyp, estimegen elde kóp, ol ıoganyń sheberi bolyp shyǵypty. Sóıtip, bularǵa da ıilip-búgilý, aıaǵyńdy moınyńa asý, basyńdy bashpaıyńa jetkizý «óneri» buıyrypty.
«Buıryqty» buljytpaı oryndaımyn dep, bolmasa da uqsap baǵamyn dep baryn sala búgilip-ıilemin dep kórshimniń beli qıralań ketip tońqalań asypty...
Artynyń qaıyryn bersin dep, ne kórmegen bas, jetpegeni ıoga edi, múmkin aldyda «óneri» budanda ótip keter «keremetter» kútip turǵan shyǵar dep oılap, óz basym – kórshimniń kelesi úkimet aýysqansha jata turyp, qulan-taza saýyqqan mezgilinde qyzmetine qaıta shyǵýyn tilep júrip jatyrmyn...
Berik SADYR
Nur-Sultan
