Ekonomıka • 11 Tamyz, 2021

Avtoóndiris alǵa basady

323 ret

kórsetildi

3 mın

oqý úshin

Bıyl alty aıda Qazaqstanda 40 myńǵa jýyq avtokólik qurastyrylypty. 40 myń tehnıkanyń bólshek-saımanyn oryn-ornyna salyp, kiltpen burap, qajetti jabdyqtaryn túgel qondyrýǵa 311,1 mlrd teńge jumsalǵan. Qurastyryp qana qoımaı, kólikterdi eksportqa da shyǵaryppyz: 4387 avtomobıl. Bul bizge 28,2 mlrd teńge tabys ákelgen.

Abaı AIMAǴAMBET

Resmı derekke súıensek, dál qazir qurylys pen óńdeýshi ónerkásip ekonomıkalyq ósimniń basty draıveri bolyp tur. Osy eki salanyń erekshe qarqyny arqasynda ekonomıka birinshi jarty jyldyqta 2,2 paıyzǵa ósken. Sońǵy ýaqytta kólik qurastyrý salasy da ekonomıkanyń tyń baǵytyna aınalyp, serpilip keledi. Avtomobıl óndirisi mashına jasaý salasynyń 31 paıyzyn menshiktep turǵany da sodan shyǵar.

Shilde aıynyń ózinde el aýmaǵynda jańa ınvestısııalyq jobalardy júzege asyrý úshin 8 qujatqa qol qoıylǵan. Qostanaıda Lada men Renault avtomobılderin qurastyrý bastalyp ta ketti. Granta-nyń shanaǵy sol jerde dánekerlenip, boıalady. AvtoBıznes qaýymdastyǵynyń dereginshe, alty aıda el aýmaǵynda qurastyrylǵan 39 795 kóliktiń 34 556-sy – jeńil avtomobıl, tórt myńnan astamy júk kólikteri bolsa, 537-si avtobýs eken. Budan bólek, tirkeme, jartylaı tirkeme jáne arnaıy mamandandyrylǵan tehnıkalardyń da úlesi artyp keledi. О́ndiris kólemi 2020-nyń alǵashqy alty aıynan 20,4 paıyzǵa asyp túsken.

Jarty jyl ishinde Qostanaıdaǵy «SaryarqaAvtoProm» zaýytynda 23 962 jeńil avtokólik qurastyrylǵan. Taǵy 148,2 mlrd teńgege júk kólikteri men avtobýstar shyǵarylypty. О́sim 2020-men salystyrǵanda 41,6 paıyzdy quraǵan. Almatydaǵy Hyundai Trans Kazakhstan jalpy somasy 116,8 mlrd teńgege 12 319 jeńil avtokólikti naryqqa shyǵarypty. Eldegi avtoóndiris Almaty jáne Qostanaımen shektelmeıdi, árıne. Semeıdegi «SemAZ» (18,4 mlrd teńgege – 2113 tehnıka), Daewoo Bus Kazakhstan (96 avtobýs), Kókshetaýdaǵy «KamAZ-Injınırıng» (16,3 mlrd teńgege – 704 júk kóligi) zaýyttary da otandyq avtokólik óndirisine eleýli úles qosýda.

Qazaqstanda qurastyrylǵan kólikter ishinde eń ótimdi brendterdiń kóshin Chevrolet bastaıdy. Bul markanyń 15 myńnan asa danasy satylyp ketken. Odan keıingi oryndarda Hyundai (12 377), Kia (4 391), JAC (2 668) jáne GAZ (2 062) bar. Bul kólikterdiń barlyǵyn derlik tek bizdiń otandastarymyz ǵana emes, sheteldikter de satyp alýda. Alǵashqy alty aıda eksport deńgeıi de 77 paıyzǵa ósipti. Hyundai, JAC, Chevrolet-ti negizinen Reseı, О́zbekstan, Belarýs jáne Qyrǵyzstan kóp satyp alǵan.