Aıaq astynan deıin desek, áneýgúni tireýi ajyrap ketken. Ol týraly áleýmettik jelide jergilikti jurt jarysa jazysqan. Tipti fotosýretine deıin júktegen. Alaıda jurttyń dabylyna qulaq túrgen bir basshy bolmady. Sol kezde kózderin shuqyp turyp kórsetken aqaýǵa basshylardyń biri mán berse, bulaısha opyrylyp jatpas edi. Abyroı bolǵanda, bala-shaǵa ótip bara jatqanda qulamaǵan. Áıtpese, qaýsap turǵan kópirdiń ústinen adam aıaǵy úzilmeıdi. Ary-beri sabylysqan kólik te kóp. Aıtpaqshy, baıaǵyda da betki jabyndysy oıylyp qalyp, avtobýstyń dóńgelegi túsip ketken eken.
Semeıdegi qoǵam belsendileriniń aıtýynsha, kópir 1997 jyldan beri apattyq jaǵdaıda tur eken. Ol ýaqytta oń jaǵalaý men Jańa Semeıdi jalǵap jatqan jalǵyz kópir-tuǵyn. Keıin 2001 jyly jańa aspaly kópir túsip, eski kópirge túsetin salmaq azaıǵan. Dese de, elý jylǵy eski ótkel elge qaýip tóndirmeı turǵan joq.
Osy joly kópir opyrylyp túse sala, qala basshylyǵy oqıǵa ornyna jetken. Kópirdiń qańqasy bútin degendeı pikirge kelgen olar qaýipsizdik úshin kópirdi ýaqytsha japqan. Aldaǵy kúnderi arnaıy mamandar kópirdi tolyqtaı tekserip, bir qorytyndyǵa keledi. Durysy, jazataıym jaǵdaı bolmaı turǵanda, kúrdeli jóndeý kerek shyǵar.
Shyǵys Qazaqstan oblysy
