Ulttyq statıstıka bıýrosy Atyraý oblysy boıynsha departamentiniń basshysy Ǵalıa Muhanǵalıevanyń aıtýynsha, halyq sanaǵyna daıyndyq kezeńi 1-30 maýsym aralyǵynda ótkizilgen. Oǵan 170 adam tartylypty. Olar turǵyn úılerdiń, ǵımarattar men turǵyn emes úı-jaılardyń tizimin jasaqtap, turǵyndardyń sanyn aldyn ala naqtylaýdy iske asyrdy.
– Ulttyq statıstıka bıýrosynyń «Aýdandastyrý» avtomattandyrylǵan aqparattyq júıesine Atyraý oblysynan 176 389 nysan engizildi. Aralaý jumystarynyń qorytyndysymen 175 641 nysan anyqtaldy. Josparly nysandardyń 99,6 paıyzy qamtyldy. Qate nysandardyń sany – 2 178. О́ńirde 149 negizgi tirkeý ýchaskesinen bólek arnaıy uıymdarda 139 nysan qalyptastyryldy. Onda turaqty turatyndardyń sany 2 877 adamdy, 11 369 tósektik oryndy qurady. Osylaısha, anyqtalǵan nysandardaǵy turǵyndar sany arnaıy uıymdarda turaqty turatyndardy qosa alǵanda 664 493 adamdy qurap otyr, – deıdi Ǵ.Muhanǵalıeva.
Onyń aıtýynsha, halyq sanaǵyna daıyndyq kezeńin ótkizý kezinde birqatar qıyndyq týyndapty. Ásirese, sanaq personalynyń jaýapsyzdyǵy men nemquraılyǵy, kóshe ataýlary men úı nómirleri ilingen anshlagtardyń joqtyǵy qıyndyq týǵyzǵan. Sondaı-aq oblystyq sáýlet jáne qala qurylysy basqarmasy tarapynan usynylǵan eldi mekenderdiń shemalyq kartasynda keıbir nysandardyń belgilenbeýi, keıbir úı sharýashylyqtarynyń sanaqtan beıhabar bolýy jumysqa keri áserin tıgizipti.
– Ulttyq halyq sanaǵynyń negizgi kezeńinde 913 adam ýaqytsha jumysqa tartylady. Onyń ishinde 114 nusqaýshy-baqylaýshy men 799 ıntervıýer bar, – dep málim etti ol.
Bul másele oblys ákimi Mahambet Dosmuhambetovtiń de nazaryn aýdardy. Ákim atalǵan kemshilikterdi joıyp, qala, aýdan ákimderine halyq sanaǵyna qoldaý bildirý qajettigin tapsyrdy.
– Intervıýerlerdi vaksınalaýdan ótkizý qajet. Mamandardyń qaýipsizdigi úshin ýchaskelik polısııa qyzmetkerlerimen birlese aralaýdy uıymdastyrý, sanaq personaldaryn qajetti oryn-jaımen, kerek-jaraqpen qamtamasyz etý qajet. Nusqaýshy-baqylaýshylar men mamandardyń qoǵamdyq kólikte tegin júrýi qarastyrylady, – deıdi oblys ákimi.
Atyraý oblysy
