Álem • 12 Tamyz, 2021

Túrkııada alapat sý tasqyny boldy

1564 ret

kórsetildi

1 mın

oqý úshin

Túrkııada orman órtinen keıin sý tasqyny bastaldy, dep habarlaıdy Egemen.kz.

Gaýhar QAPASh

Bul týraly Reuters agenttigi málimdedi.

Qatty jaýyn-shashynnan bolǵan sý tasqyny Túrkııanyń Qara teńiz jaǵalaýyndaǵy kópirdi qıratyp, birneshe eldi mekendi jaryqsyz qaldyrdy.

Sý tasqyny Sınop, Bartyn, Qarabıýk jáne Kastamoný provınsııalaryna áser etti. Túrkııanyń soltústigindegi Bartyn provınsııasynda kópir qulady. Tótenshe jaǵdaı saldarynan 13 adam zardap shegip, bir adam ınfarkttan qaıtys boldy. Sonymen qatar qutqarý qyzmetkerleri joǵalǵan 80 jastaǵy áıeldi izdestirip jatyr.

Premer‐Mınıstr janyndaǵy tótenshe jaǵdaılar jáne apattar basqarmasy (AFAD) málimeti boıynsha, 12 aýylda elektr qýaty úzilgen. Sondaı-aq ǵımarattardyń birinshi qabattary sý astynda qalǵan.

Bartynnan 240 shaqyrym jerde ornalasqan Sınop provınsııasynda sý tasqyny saldarynan bir úı qulady. Provınsııanyń tabıǵı apattan zardap shekken aýdandarynda kóp úı men kásiporyndy sý basty. Sheneýnikter bul aımaqtaǵy memlekettik aýrýhana saqtyq sharasy úshin evakýasııalanǵanyn habarlady.

Derekterge sáıkes, qazirgi ýaqytta izdestirý-qutqarý jumystary júrgizilip jatyr. Turǵyndar sý basqan úılerden úrlemeli qaıyqtarmen kóshirilip jatyr.

Eske salaıyq, shildeniń sońynan bastap Túrkııada orman órtteri órship tur. Tanymal kýrorttar 13 provınsııadaǵy orman órti saldarynan týrıstik maýsymnyń ortasynda ot pen tútinge orandy. Keıbir jerlerde jalyn turǵyn úıler men qonaq úılerge jaqyndady, týrıster men jergilikti turǵyndar evakýasııalandy. Keıin terrorıstik uıym Túrkııadaǵy órt úshin jaýapkershilikti óz moınyna aldy.