Oqıǵa • 12 Tamyz, 2021

Qaraǵandyda aýyl ákimi áıelge qol kóterdi dep aıyptalýda

1 mın

oqý úshin

Qaraǵandy qalasynyń 54 jastaǵy turǵyny Osakarov aýdany Pıoner aýyldyq okrýgi ákiminiń ústinen polısııaǵa aryz bergen. Turǵyn sheneýnikke urdy dep aıyp taqqan, dep habarlaıdy Egemen.kz.

Gaýhar QAPASh

Qaraǵandyda aýyl ákimi áıelge qol kóterdi dep aıyptalýda

Aryzdanýshy Qaraǵandy qalasynyń ońtústik-shyǵys polısııa bólimine júgingen. Onyń aıtýynsha, onymen sheneýnik arasyndaǵy janjal Shahterler dańǵylyndaǵy úıdiń kireberisi mańynda bolǵan. Jábirlenýshi dene jaraqatyn alǵanyn aıtty.

Sot-medısınalyq saraptama qorytyndysyna sáıkes, ótinish berýshiniń densaýlyǵyna jeńil zııan keltirilgen. Bul oqıǵaǵa polısııa pikir bildirdi.

«Derek boıynsha polısııa qyzmetkerleri Osakarov aýdanynyń 49 jastaǵy turǵynyn anyqtady. Er adamǵa qatysty QR ÁQBK-niń 73-1-baby «Densaýlyqqa qasaqana jeńil zııan keltirý» boıynsha ákimshilik hattama toltyryldy», dedi Qaraǵandy oblysy PD baspasóz qyzmetindegiler.

Sondaı-aq jaǵdaıǵa qatysty memlekettik qyzmetkerdiń ádep jónindegi ýákili, Osakarov aýdany ákiminiń orynbasary Nurlan Lambekov te pikir bildirdi. Ol qazirgi ýaqytta Pıoner aýyldyq okrýginiń ákimi demalysta ekenin aıtty.

«Ol 1 qyrkúıekke deıin demalysta. Bul oqıǵanyń mán-jaıyn bilmeımiz. Ol jumysqa shyqqan boıda arnaıy tekserý júrgizemiz. Bilýimizshe, ótinish berýshi onyń týysy. Bul turmystyq janjal shyǵar, múmkin olar tatýlasady. Qalaı bolǵanda da, sot sheshimin kútemiz. Ol demalysta júrgende biz eshteńe isteı almaımyz», dedi Nurlan Lambekov.