Aýstralııanyń astanasy Kanberra qalasynda seısenbide jergilikti turǵynnyń vırýs juqtyrǵany anyqtalǵannan keıin shaharda bir aptalyq lokdaýn jarııalandy. Kanberra Sıdneıden ońtústik-batysqa qaraı 260 km qashyqtyqta ornalasqan. Sondyqtan jergilikti bılik qaýipti indettiń taralýy kúsheıip ketýinen qaýiptenip otyr.
Osylaısha, Aýstralııa eki iri qalada – Sıdneı men Melbýrnde qatań karantındik shekteýler engizdi. Bul qadam Delta shtamynyń budan ári taralýyna tosqaýyl bolýǵa tıis.
Qorǵanys mınıstriniń ókili Pıter Datton Reuters-ke bergen suhbatynda New South Wales shtatynyń bıligi jaqyn arada resmı túrde qosymsha áskerı qoldaý suraıtynyn aıtty.
Qazirgi tańda 580-ge jýyq áskerı qyzmetshi Aýstralııanyń halyq eń kóp qonystanǵan qalasy Sıdneıde karantındik talaptardyń saqtalýyn qamtamasyz etý úshin polısııaǵa kómektesip júr.
Shtat sheneýnikteri alysta ornalasqan birneshe qalada vırýstyń taralýy baqylaýdan shyǵyp ketýi múmkin dep qaýiptenedi. Soǵan baılanysty jedel túrde karantın engizdi.
Sıdneıde lokdaýn jarııalanǵanyna jeti apta ótkenine qaramastan, kúndelikti ınfeksııa juqtyrǵandar sany rekordtyq deńgeıden túspeı tur. Qala mańyndaǵy úsh aýdanda lokdaýn erejeleri kúsheıtildi. Soǵan sáıkes adamdardyń úılerinen 5 km qashyqtyqqa barýy shektelgen.
