– Vaksına saldyrý – indettiń aldyn alýdyń ǵana emes, ujymdyq ımmýnıtetti qalyptastyrýdyń jalǵyz joly. Sol sebepten basqarma basshylaryna baǵynysty mekemelerdegi qyzmetkerlerdi vaksınalaý deńgeıin 90 paıyzǵa deıin jetkizý júkteledi. Bárińizge kemshilikterdi túzetý úshin eki apta ýaqyt beremin. Jumys jolǵa qoıylmasa, sizderge qatysty táriptik jaýapkershilik qaralady, – deıdi oblys ákimi.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýyna qaraǵanda, koronavırýs ınfeksııasyna qarsy vaksınalaýdyń kúndelikti josparyna ózgeris engizilipti. Endi kún saıyn vaksına alatyndar sany 1 050-den 3 500-ge deıin artpaq.
– О́ńirge birinshi komponent úshin 170 295 doza, ekinshi komponentke arnalǵan 138 695 doza vaksına jetkizildi. Sońǵy 10 kúnde vaksına alǵan adamdardyń sany 13,1 paıyzǵa artty. Vaksınalaýǵa jatatyn kontıngentter arasynda eń joǵary kórsetkish quqyq qorǵaý organdaryna (170%), al eń tómengi kórsetkish stýdentter (38,3%) arasynda baıqalyp otyr, – deıdi A.Baıdýálıev.
Onyń pikirinshe, ınfeksııalyq stasıonarlardyń jansaqtaý bóliminde jatqan naýqastarǵa qatysty taldaý júrgizilgen. Qazir stasıonarlarda koronavırýs ınfeksııasyn juqtyrǵan 1 751 naýqas emdelip jatyr. Jansaqtaý bóliminde 87 naýqas oqshaýlanǵan. Jaǵdaıy aýyr naýqastardyń birde-biri vaksına almaǵany anyqtalypty.
– «Jylyoı aýdanynda turǵyndardyń 13,7 paıyzy vaksına saldyrǵan. Al Maqatta – 22,5, Isataıda – 28,7, Qyzylqoǵa aýdany turǵyndarynyń 28,1 paıyzy vaksına ektirgen», deıdi A.Baıdýálıev.
Osyǵan baılanysty oblys ákimi Mahambet Dosmuhambetov Jylyoı jáne Maqat aýdanynyń ákimderine jumysty tıisti deńgeıde uıymdastyrýdy, salaǵa jetekshilik etetin orynbasarlaryna qatysty tártiptik shara qoldanýdy tapsyrdy. Ákimniń pikirinshe, ár eki kún saıyn Atyraý qalasy men aýdandar, salalyq uıymdar, kásiporyndar jáne basqa da mekemeler vaksınalaý týraly baıandaýy qajet. Vaksınamen qamtýdyń táýliktik kórsetkishin jaqsartý úshin naqty sharalar qabyldanady. Aýdandardaǵy vaksınalaý qarqynyn jandandyrý úshin ádistemelik kómek kórsetiledi.
Vaksına alýdyń tómendiginen be, álde indet oshaǵynyń kóbeıýinen be, Atyraýda koronavırýs ınfeksııasyna shaldyǵý deregi azaıar emes. Máselen, oblystyq sanıtarlyq-epıdemııalyq baqylaý departamenti basshysynyń orynbasary Gúlnaz Erbatyrovanyń deregine súıensek, shildede koronavırýs ınfeksııasyn juqtyrýdyń 9 445 jaǵdaıy tirkelgen. Al tamyzdyń alǵashqy on kúninde 4 379 naýqas anyqtalǵan.
– Koronavırýs ınfeksııasyn juqtyrǵan naýqastardyń 60 paıyzy Atyraý qalasynda tirkelip otyr. Buǵan qosa Jylyoı aýdany men Teńiz ken ornynda epıdemııalyq ahýal nasharlady. Qaýipti vırýsqa shaldyqqandardyń 59 paıyzy klınıkalyq sımptom negizinde anyqtaldy. Al 15-20 paıyzy – naýqastarmen qarym-qatynasta bolǵandar. Bul óńirde epıdemııalyq ahýaldyń nasharlaǵanyn baıqatady, – deıdi G.Erbatyrova.
Infeksııalyq stasıonarlarda jatqan naýqastardyń keıbiriniń emdelgenine aıdan asqan. Sonyń biri – Altyn Tólegenova maýsym aıynyń basynda Inder aýdandyq aýrýhanasyna jatqyzylǵan. Jaǵdaıy nasharlaǵan soń, Atyraý qalasyndaǵy modýldik aýrýhananyń jansaqtaý bólimine aýystyrylypty.
– Jansaqtaý bóliminde eki jaqty pnevmonııa, ókpeniń 96 paıyzy qabynǵan degen dıagnoz qoıyldy. Bir aı boıy ókpeni jasandy jeldetý apparatyna qosýly jattym. Dárigerler júrgizgen emniń nátıjesinde qaýipti vırýstan saýyǵa bastadym. Meni beıindi bólimsheniń palatasyna aýystyryp, emdelýdi jalǵastyrdym, – deıdi A.Tólegenova.
Ol 10 tamyzda modýldik aýrýhananyń ınfeksııalyq stasıonarynan úıine shyǵaryldy. Endi úsh aı boıy turǵylyqty mekenjaıynda dárigerlerdiń baqylaýynda bolady. Sondaı-aq arnaıy ońaltýdan ótedi.
– Endi 10 kún boıy ottegi konsentratorynyń kómegimen dem alamyn. Sodan keıin dárigerlerdiń baqylaýymen ókpeniń jumysyn qalpyna keltiremin. Osy oraıda emdelý kezinde dárigerlerge kórsetken qamqorlyǵy men jyly sózi úshin alǵysymdy bildirgim keledi. Al turǵyndardan týǵan-týystaryńyz ben jaqyndaryńyzdyń qaýipsizdigi úshin maska taǵyp, adamdar kóp jınalatyn oryndarǵa barmaýdy suraımyn, – deıdi A.Tólegenova.
Taǵy bir emdelýshi – 56 jastaǵy Jibek Qazıeva №2 oblystyq aýrýhanaǵa 17 shildede ókpesiniń 90 paıyzy qabynyp túsken bolatyn. Biraq ol jansaqtaý bólimine jatqyzylmaı, beıindik bólimde emdeldi. Em-domnyń nátıjesinde syrqatty jeńip, 8 tamyzda aýrýhanadan shyqty. Endi ol da Mahambet aýdanyndaǵy ýchaskelik dárigerdiń baqylaýyna alynady.
Atyraý oblysy
