...oı bólisedi
Aýylymyzdyń irgesi berik, tútini túzý
Keńes Odaǵy ydyraǵan soń aýyldan bereke kete bastady deıtinder kóp. Bul sóz negizsiz de emes. О́ıtkeni ómirimizge dendep engen naryqtyq ekonomıkanyń zańy asa qatal. О́kimet óltirmeıdi deıtin qatań kózqarastan arylyp, árkim ózinshe tyrbanyp tirshilik etpese, aldaǵy kúniń bulyńǵyr bolmaq.
Aýyl – qazaqylyqtyń qaımaǵy buzylmaǵan altyn qazynasy, ulttyń ustyny. «Aýyl – altyn besigimiz». Aýyl joq jerde qazaq ta joq. Sondyqtan aýyldy saqtap qalýdyń mańyzy asa joǵary.
Osy jerde meniń aıtpaǵym, bizdiń aýyldyń irgesi berik, tútini túzý. Qańyrap bos qalǵan birde-bir úı joq. Qaıta úılerin jańalap, erteńgi kúnderine bek senimdi ekendikterin ańǵartqan otbasylar barshylyq.Máselen, bıyldyń ózinde jańadan jeti-segiz úı boı kóterdi. Alda da kóterile beretinine senim mol. Al buǵan aýyldastarymnyń ómirdiń máni de, sáni de eńbek deıtin ustanymdary dálel.
Bir ǵana áttegen-aıy, osydan biraz jyl buryn órtenip ketken klýb úıi qaıtyp qalpyna keltirilgen joq. Osy másele oń sheshilse, aýyl ómiri kóńildi bola túspek.
Jeńis SMAǴULOV,
aýyl turǵyny
Aqmola oblysy,
Birjan sal aýdany,
Sáýle aýyly
...qynjylysyn bildiredi
Ekpe almaı, eńsemiz kóterilmeıdi
COVID-19-dyń elimizge dendep engenine de bir jarym jyldan asyp barady. Tıisti jaýapty oryndar tarapynan qabyldanyp kele jatqan qajetti sharalarǵa qaramastan, indettiń beti qaıtar túri baıqalmaıdy. Buǵan bir jaǵynan ózimizdiń de kinámiz bar. Saqtyq sharalaryna tolyq moıynsyna bermeımiz. Toı-tomalaq, basqa da kópshilik is-sharalar men basqosý, jıyndar bir sát tolastaǵan emes. Osyndaı jaýapsyz qadamdardyń saldary da aýyr, sońy keıbir jaǵdaılarda ólim-jitimge soqtyryp jatyr.
Menińshe, bul indetke qarsy turýdyń eń bir utymdy joly – ekpe saldyrý, sóıtip ujymdyq ımmýnıtet qalyptastyrý. Qazir ne kóp, aqparat kóp. Áleýmettik jelini ashyp qalsań, ekpege qarsylyq tanytqan, biraq kóldeneń tartar birde-bir aıǵaq, dáleli joq aqparattan kóziń tunady. Al feıkterge senip, ekpe deseń at-tondaryn ala qashatyndar qatary kóbeımese azaıar emes. Bir qyzyǵy, ondaılardyń arasynda qarapaıym azamattarmen qatar, oqyǵan-toqyǵany bir basyna jetetinder kóp.
Budan shyǵatyn qorytyndy mynadaı: halyq arasynda áli de bolsa vaksınanyń mańyzy týraly nasıhat jumystary jetkiliksiz. Ekpeniń tıimdiligin bilikti mamandar jiliktep túsindirip berse, qol-aıaǵyn tirep siresip turǵandar qatary aıtarlyqtaı seldireıtini sózsiz. Áıtpese kúni keshe ótken Úkimet otyrysynda aýyryp jatqandardyń 99,9 paıyzy ekpe almaǵandar ekeni atap kórsetildi. Kim-kimge de oı salatyn jaıt.
Hamza TAShAÝOV,
«ADM Machineri&Service» JShS
dırektorynyń satý jónindegi orynbasary
NUR-SULTAN
...birizdilikke shaqyrady
Aty-jónimizdi qashan durystaımyz?
Elimiz táýelsizdigin jarııalaǵaly beri 30 jylǵa jýyq ýaqyt ótti. Biraq azamattarymyz áli kúnge ózderiniń aty-jónderin bir izge túsirip, qazaqshalaı qoıǵan joq. «Ov» pen «ev»-ke keneshe jabysqandar aramyzda áli tolyp júr. Qazaqtyǵymyz tolyq qalypqa túspeı, bul másele jónge kele qoımaıtyn sekildi. Buǵan aramyzda orys tiliniń yqpaly burynǵysynsha kúshti bolyp turǵany da óz kesirin az tıgizip otyrǵan joq desek, qatelespeıtin shyǵarmyz.
Jalpy, ózge ulttardyń kim ekenin ata-teginiń jazylýynan-aq birden ańǵarasyń. Tipti keńestik kezeńde de ulttyq qalyptarynan ajyramaǵan halyqtar barshylyq. Sondyqtan osy ultymyz úshin mańyzy aıtarlyqtaı joǵary iske basa mán beretin kezdiń kelgeni anyq. Jáne bir atap aıtar jaıt, ata-tegimdi qazaqshalaımyn degenderge tıisti organdar tarapynan bıýrokratııalyq tosqaýyldardy meılinshe azaıtý kerek. О́ıtkeni osy bir qaqpaqyl men sozbuıdadan qashyp, HQO jaqqa attap basqysy kelmeıtinder de az emes ekeni anyq.
Erdahmet DOSTEMESULY,
eńbek ardageri
Jambyl oblysy,
Moıynqum aýdany,
Shyǵanaq aýyly
...ustanymyn ortaǵa salady
Bul – meniń jeke kózqarasym
Keıbireýdiń jeke ustanymy, ómirdegi qubylystarǵa kózqarasy kópshiliktiń pikirimen qabyspaı jatýy ábden múmkin. Biraq qazirgi demokratııa dep aıdar taǵylǵan zamanda kez kelgen adamnyń óziniń belgili bir máselege qatysty kózqarasy men ustanymyn ashyq bildirýge tolyq quqyǵy bar ǵoı dep bilemin.
Osy oraıda meniń aıtpaǵym myna bir shetin másele jaıynda edi. Búginde qyz urlaý úderisi burynǵy kezderdegideı keń etek jaımasa da kezdesip qalyp jatady. Al bul máselege qarsylar qatary da kún ótken saıyn qalyńdaı túsip otyrǵandaı. Qyz urlaǵandar qatań jazaǵa tartylýy tıis deıdi osy kózqarastaǵylar. Olardyń ýájderi de belgili: eki jas óz erikterimen súıip qosylýlary kerek.
Buǵan qarsy ýáj keltiretin bolsam, men de qyz alyp qashyp úılendim. Qazir zańdy nekedemiz. Tegin de ózime aýystyryp aldym. Biz sııaqty osyndaı jolmen baqytyn tapqandar da az emes ekeni taǵy aıan. Barlyǵy qyzdyń aqyl-parasatyna baılanysty. Al urlaǵan jigitke turmysqa shyǵýǵa úzildi-kesildi qarsylyq tanytsa, ondaı qyzdy zorlyqpen ustaýdyń da qajeti joq qoı dep oılaımyn. Sonda «quda da, qudaǵı da tynysh» bolady, ıaǵnı jigit jaǵy isti bolýdan basyn arashalap qalady.
Kenjetaı BAIQOJA
Qaraǵandy oblysy,
Temirtaý qalasy
