RBK Talıbandardyń Aýǵanstandaǵy pozısııasynyń kúsheıýi aıasynda Norvegııa men Danııa Kabýldaǵy elshilikterin ýaqytsha jaýyp jatqanyn jazady.
Norvegııanyń syrtqy ister mınıstri Ine Erıksen Sereıde elshiliktiń barlyq qyzmetkeri Norvegııaǵa kóshiriletinin aıtty.
«Bul jumysshylarǵa da, aýǵandyqtarǵa da qatysty», dedi ol.
4 tamyzda Norvegııa bıligi óz azamattaryn Aýǵanstannan ketýge shaqyrdy.
Germanııa aldaǵy birneshe kún ishinde Aýǵanstan astanasyndaǵy elshiliginiń qyzmetkerlerin «absolıýttik mınımýmǵa» deıin qysqartatynyn habarlady. Jumysshylar charterlik ushaqtarmen shyǵarylady. Nemis dıplomattarymen jumys istegen aýǵandyqtar da evakýasııalanýda. Vızasy joqtar úshin qajetti qujattar Germanııada beriledi.
AQSh ta dıplomattaryn qysqartady. CNN AQSh Memlekettik departamentiniń ókili Ned Praısqa silteme jasaı otyryp, Kabýldaǵy amerıkandyq dıplomattar men AQSh elshiligi qyzmetkerlerin evakýasııalaýdy qamtamasyz etý úshin 3 myńǵa jýyq amerıkandyq ásker Aýǵanstanǵa jiberiletinin habarlady.
Ulybrıtanııa Aýǵanstanǵa evakýasııaǵa kómektesý úshin 600-ge jýyq ásker jiberedi, dep habarlaıdy The Washington Post.
Reseı ázirge dıplomattardy evakýasııalaýdy josparlap otyrǵan joq.
«Elshilik evakýasııaǵa daıyn emes, mundaı múmkindik qazir qarastyrylmaǵan», dep habarlady dıplomatııalyq ókildigi TASS-qa bergen málimetinde.
Tájikstan Mazarı-Sharıf, Faızabad jáne Badahshan provınsııalaryndaǵy konsýldyqtardy ýaqytsha japty, al Kabýldaǵy elshilik jumysyn jalǵastyryp jatyr, dep jazady Sputnik Tájikstan.
Qazaqstannyń Syrtqy ister mınıstrligi Aýǵanstandaǵy dıplomatııalyq mıssııanyń jumysy týraly áli resmı málimdeme jasaǵan joq.
Amerıka Qurama Shtattary áskerin shyǵara bastaǵannan keıin Aýǵanstandaǵy jaǵdaı ýshyǵyp ketti. AQSh prezıdenti Djo Baıden eldegi áskerı mıssııa 2021 jyldyń 31 tamyzynda aıaqtalatynyn habarlady. Osy ýaqytta Talıban radıkaldy qozǵalysy aýqymdy shabýyl uıymdastyryp, kóptegen provınsııany basyp aldy. Onyń qatarynda eldegi aýqymy boıynsha ekinshi oryndaǵy Kandagar qalasyn, sondaı-aq úshinshi oryndaǵy Gerat qalasy bar.
Aıta keteıik, Talıban uıymyna Qazaqstanda tyıym salynǵan.
