Atyraý oblysy Balyq sharýashylyǵy komıtetiniń buıryǵymen 17 tamyzdan bastap Kaspıı teńizinde tormen balyq aýlaýǵa tyıym salynady.
Basqarma basshysy Artýr Sádibekulynyń aıtýynsha, qazir balyq aýlaý úshin arnaıy tor qoldanatyndar kóp. Bul jyl saıyn sý astyndaǵy tirshilik ıelerine, ásirese, erekshe qorǵalatyn bekire balyǵy men ıtbalyqtyń kóbeıýine teris áserin tıgizedi.
«Atyraý oblysynyń akvatorııasynda sý keńistigin paıdalaný erejesi (Jaıyq ózeniniń saǵasynan solǵa jáne ońǵa 50 shaqyrym, 3 metr tereńdikke deıin) tolyq saqtalmaıdy. Janar-jaǵarmaı men ýaqytty únemdeý úshin nemese tıisti materıaldyq-tehnıkalyq bazanyń joqtyǵynan balyqshylar erejede kórsetilgendeı, Jaıyq ózeniniń saǵasynan 50 shaqyrym qashyqta júrmeıdi. Olar tikeleı tyıym salynǵan aımaqta tor qurady. Nátıjesinde, torǵa ýyldyryq shashýǵa nemese qystaý úshin ózenge keletin balyqtar túsedi. Sonyń saldarynan sońǵy jyldary Jaıyq ózenine qonys aýdaratyn jartylaı ótpeli balyq sany aıtarlyqtaı azaıyp otyr», deıdi basqarma basshysy Artýr Sádibekuly.
