«Ǵanı áıeli, keńsesiniń dırektory jáne Ulttyq qaýipsizdik jónindegi keńesshisimen birge Tashkentke ushyp ketti», dep keltiredi basylym prezıdenttiń jeke kúzetshisiniń sózin.
Al Facebook jelisindegi paraqshasynda Ashraf Ǵanı qantógistiń aldyn alý úshin ókilettiginen bas tartqanyn málimdep, jazba jarııalaǵan.
«Talıbandar meni taǵymnan ketirý úshin túgeldeı Kabýlǵa shabýyl jasaýǵa daıyn ekenin uqtyrdy. Qantógistiń aldyn alý úshin men ketýdi uıǵardym», dep jazdy Ashraf Ǵanı.
Onyń aıtýynsha, «tálipter aýǵan halqynyń múlki men qaýipsizdigine jaýapty».
«Talıban sotta qarýmen jeńdi, endi otandastarynyń abyroıy, múlki jáne qaýipsizdigi úshin jaýapkershilik aldy. Biraq júrekterdi jaýlap ala almady. Tarıhta eshqashan jabaıy kúsh eshkimge zańdylyq bergen emes, bermeıdi de. Qazir jańa tarıhı synaqtan ótýimiz kerek: olar Aýǵanstan halqynyń abyroıyn tókpeıdi, ne basqa jerler men jelilerge nazaryn burady», dep jazdy Ashraf Ǵanı.
Buǵan deıin Jelide Aýǵanstan prezıdenti elden ketkeni túsirilgen vıdeo jarııalanǵan. Onyń qasynda oqqaǵarlary bolǵan.
Eske salaıyq, 15 tamyzda «Talıban» terrorıstik qozǵalysy Aýǵanstannyń búkil aýmaǵyn baqylaýǵa alǵanyn jarııalady. Sodyrlar Úkimetpen Kabýlǵa beıbit jolmen kirý múmkindigi týraly kelissóz júrgizip jatqanyn jáne Aýǵanstan úkimeti ótpeli kezeń aıaqtalǵanǵa deıin Kabýldyń qaýipsizdigi úshin jaýap beretinin aıtqan.
