2021 jyldyń naýryz aıynda bastalǵan jobanyń alty aılyq oqý kýrsyn arnaıy irikteýden ótken 30 qatysýshy sátti támamdap, arnaıy sertıfıkattarmen marapattaldy.
Oqý kýrsy aqysyz negizde, jeke anımasııalyq stýdııalardyń atsalysýymen qaıyrymdylyq joba retinde júzege asyryldy. Balalardy oqýǵa qajet arnaıy planshetter men ózge de tehnıkalyq quraldarmen «Qazaqstan» telekorporasııasy qamtamasyz etken.
Mınıstrliktiń bastamasymen balalarǵa sapaly bilim berý maqsatynda halyqaralyq baılanystar ornatyldy. Ońtústik Koreıanyń Mýltıplıkasııalyq fılmderdi nasıhattaý agenttigimen Yntymaqtastyq memorandýmyna qol qoıylyp, kelisim jasaldy. Nátıjesinde Ońtústik Koreıa men Japonııanyń úzdik mýltıplıkator mamandary anımasııa mektebiniń qatysýshylaryna onlaın dáris oqyp, sheberlik sabaqtaryn ótkizdi.
Erekshe bilim alý qajettilikteri bar balalarǵa bolashaqta mamandyǵyna aınalatyn kásipti úıretý arqyly jańa múmkindik syılaý, erekshe balalardy áleýmettik beıimdeýge járdemdesý jáne olardyń bos ýaqytyn tıimdi ótkizýdi uıymdastyrý maqsatynda qurylǵan mekteptiń alǵashqy túlekteri Qazaqstannyń túrli aımaǵynda turatyn 14-16 jas aralyǵyndaǵy daryndy balalar. Oqý baǵdarlamasy onlaın formatta, arnaıy sabaq kestesine saı júrgizilgen.
Oqýshylar alǵashqy aıda «Anımasııa negizderi» taqyrybyndaǵy jalpy dáriske qatysyp, anımasııa salasymen tanysty. Keıin qyzyǵýshylyǵy men beıimine, múmkindigine qaraı 2D animation, 3D animation jáne Stop Motion toptaryna bólinip, bilim aldy.
Sátti júzege asyrylǵan jobaǵa qatysýǵa ótinimderdiń áli de tolastamaýyna baılanysty Anımasııa mektebiniń jumysyn turaqty túrde jalǵastyrý josparlanyp otyr.
