Memleket basshysynyń Qazaqstan halqyna arnaǵan Joldaýynan keıin Bas prokýratýranyń keńeıtilgen alqa májilisi boldy.
Memleket basshysynyń Qazaqstan halqyna arnaǵan Joldaýynan keıin Bas prokýratýranyń keńeıtilgen alqa májilisi boldy.
Alqa jumysyna Prezıdent kómekshisi – Qaýipsizdik Keńesiniń hatshysy Qaırat Qojamjarov, Prezıdent Ákimshiliginiń jaýapty qyzmetkerleri, Bas prokýratýra ortalyq apparatynyń, Quqyqtyq statıstıka jáne arnaıy esepke alý jónindegi komıtetiniń, Bas áskerı jáne Bas kólik prokýratýralarynyń qyzmetkerleri, oblystyq jáne olarǵa teńestirilgen prokýrorlar, beınekonferensııalyq baılanys rejiminde oblystyq, qalalyq jáne aýdandyq deńgeıdegi prokýratýralar qyzmetkerleri qatysty.
Alqada Bas prokýror memlekettik apparat pen quqyq qorǵaý organdarynyń aldyna Prezıdent Nursultan Nazarbaev qoıǵan strategııalyq mindetterdi jetkizdi. Ashat Daýylbaev barlyq jeke quramǵa baǵdarlamalyq qujattyń erejelerin muqııat zerdeleýdi, Joldaýda kórsetilgen tapsyrmalardy júzege asyrý jónindegi is-sharalar josparyn ázirleý boıynsha jumys tobyn qurýdy tapsyrdy. Sondaı-aq, jınalysta prokýratýra organdarynyń ótken jylǵy jumys qorytyndylary talqylandy, Prezıdent bergen tapsyrmalardy eskere otyryp, qyzmettiń aldaǵy kezeńge arnalǵan negizgi baǵyttary aıqyndaldy.
Budan keıin sóz sóılegen Qaýipsizdik Keńesiniń hatshysy Qaırat Qojamjarov, quqyq qorǵaý organdarynyń tıimdiligin, zańdylyq pen quqyqtyq tártiptiń deńgeıin odan ári arttyrý, shıelenisti jaǵdaılardy eskertý jáne ekstremızm men terrorızmge tosqaýyl qoıýdyń utymdy tetikterin ázirleý jónindegi Memleket basshysynyń tapsyrmalaryn oryndaýdaǵy prokýratýranyń úılestirýshilik rólin atap kórsete otyryp, «Qazaqstan-2050» Strategııasyn júzege asyrýdaǵy qadaǵalaý organdary jumysynyń basym baǵyttaryn belgiledi. Májilis barysynda zańdylyqtyń jaı-kúıi jáne prokýrorlyq qadaǵalaýdyń ártúrli qyrlary egjeı-tegjeıli talqylanyp, sheshimin tabýy tıis problemalyq máseleler kóterildi, aldaǵy kezeńge arnalǵan basym baǵyttar aıqyndaldy.
«Qazaqstan-2050» Strategııasyn, sondaı-aq, Prezıdenttiń 2013 jylǵy qańtarda quqyq qorǵaý organdarymen ótkizgen jınalysta bergen tapsyrmalaryn júzege asyrý prokýratýra organdary qyzmetiniń negizgi ózegine aınaldy. Maqsatqa baǵyttalǵan jumystardyń nátıjesinde berilgen tapsyrmalardyń tolyqtaı jáne belgilengen merziminde oryndalýyna qol jetkizildi. Quqyq qorǵaý qyzmetin jetildirýdiń mańyzdy baǵyttary boıynsha jemisti zańnamalyq jumys jyldyń basty qorytyndylarynyń biri boldy. Jańa Qylmystyq jáne Qylmystyq is júrgizý kodeksteri Parlament qaraýyna engizildi. Quqyq qorǵaý júıesin odan ári jańǵyrtýdyń, dinı ekstremızm men terrorızmge qarsy is-qımyldyń memlekettik baǵdarlamalary, Quqyq qorǵaý organdarynyń kadr saıasaty tujyrymdamasy, Quqyq qorǵaý jáne arnaıy memlekettik organdar basshylarynyń prezıdenttik rezervin qalyptastyrý erejesi daıyndaldy jáne olardy Elbasy bekitti. О́zge de ózekti quqyqtyq aktiler boıynsha jumys jalǵasýda.
Qadaǵalaý qyzmetiniń aıasynda prokýrorlardyń basty kúsh-jigeri halyqtyń áleýmettik álsiz jikteriniń, kásipkerlerdiń jáne memlekettiń zańdy quqyqtary men múddelerin qorǵaý problemalaryna baǵyttaldy. Sybaılas jemqorlyq jáne ekstremızm kórinisterine qarsy turý boıynsha aýqymdy jumystar júrgizilgen. 450 myńnan astam zańdylyqtyń buzylýy anyqtalyp, 32 myńnan astam zańsyz quqyqtyq aktilerdiń kúshi joıyldy. 735 qylmystyq is qozǵaldy. 670 myń azamattyń quqyqtary qalpyna keltirildi, olardyń arasynda 155 myń kámeletke jasy tolmaǵandar, 14,5 myń múgedekter men qarttar úılerindegi adamdar bar. Azamattardyń quqyqtaryn buzǵandary úshin 11 myńǵa jýyq laýazymdy tulǵa jáne prokýrorlyq qadaǵalaý aktileri boıynsha barlyǵy 60 myńnan astam quqyq buzýshylar ártúrli jaýapkershilikke tartyldy.
Radıkaldyq dinı ıdeologııany taratýdyń jolyna tosqaýyl qoıýǵa baǵyttalǵan jumys júrgizýdiń nátıjesinde sottardyń sheshimimen terrorızm jáne ekstremızm ıdeıalaryn nasıhattaýshy 596 destrýktıvti ınternet-resýrsqa kirý toqtatyldy. Kezekshi prokýrorlar ınstıtýtynyń jemisti qyzmet etýi nátıjesinde ishki ister organdarynyń qyzmettik bólmelerinen zańsyz ustalyp otyrǵan 2 myńǵa jýyq azamat bosatyldy. Negizsiz júrgizilip kelgen 672 jedel-izdestirý is-sharalary toqtatyldy. Prokýrorlardyń narazylyǵy boıynsha 1432 tulǵaǵa qatysty 1142 sot aktileri zańǵa sáıkes keltirildi.
Qylmystyq qýdalaý organdarynyń 2,5 myńnan astam laýazymdy tulǵalary esepke alý-tirkeý tártibin buzý jáne qylmysty jasyrý faktileri úshin jaýapkershilikke tartyldy.
Prokýrorlardyń aralasýynan keıin memlekettiń kirisine 8 mıllıardqa jýyq teńgeni, azamattar men zańdy tulǵalardyń paıdasyna 14 mıllıard teńgeni óndirý týraly sot aktileri oryndaldy.
Alqa jumysynyń qorytyndysy boıynsha Bas prokýror óńirlik prokýrorlarǵa qadaǵalaý qyzmetiniń tıimdiligin odan ári arttyrý, el Prezıdentiniń Joldaýyndaǵy tapsyrmalardy júzege asyrý boıynsha naqty mindetter qoıdy.
Aleksandr TASBOLATOV,
«Egemen Qazaqstan».
