Demalys. Senbi. Redaksııadamyz. Gazettiń kezekti nómiri daıyndalyp jatyr. Jeksenbige. Elbasy Joldaýyna baǵyshtalǵan arnaýly shyǵarylym oılastyrdyq. Nege? Jylda jasalatyn, dástúrge aınalǵan Joldaý emes pe? Iá, jyl saıyn jarııa etiletin Joldaý. Ret sany boıynsha on segizinshi Joldaý. Negizinen alǵanda «Qazaqstan-2050» Strategııasyn ári qaraı tarata túsetin Joldaý deýge de bolady. Sonyń ózinde de bul Joldaýdyń jóni bólek.
* Birinshi baǵana
Demalys. Senbi. Redaksııadamyz. Gazettiń kezekti nómiri daıyndalyp jatyr. Jeksenbige. Elbasy Joldaýyna baǵyshtalǵan arnaýly shyǵarylym oılastyrdyq. Nege? Jylda jasalatyn, dástúrge aınalǵan Joldaý emes pe? Iá, jyl saıyn jarııa etiletin Joldaý. Ret sany boıynsha on segizinshi Joldaý. Negizinen alǵanda «Qazaqstan-2050» Strategııasyn ári qaraı tarata túsetin Joldaý deýge de bolady. Sonyń ózinde de bul Joldaýdyń jóni bólek.
Elim deıtin, jerim deıtin, eliniń, jeriniń qamyn jeıtin árbir qazaq úshin, osy memleketpen janyn jaqyndastyryp, oı-armanyn astastyryp úlgergen árbir qazaqstandyq úshin Prezıdent Nursultan Nazarbaevtyń halyqqa arnaǵan bul jolǵy sózi eń aldymen ata-babalarymyzdyń san myń jyldan bergi asyl armanyn – álem elderimen terezesi teń qatynas quryp, álem kartasynan oıyp turyp oryn alatyn Táýelsiz Memleket ataný armanyn, turmysy baqýatty, tútini túzý ushqan, urpaǵy erteńine senimmen qaraıtyn baqytty El bolý armanyn aqıqatqa aınaldyrǵanymyzdy atap aıtýymen, bolashaǵymyzǵa baǵdar etetin, ultty uıystyryp, uly maqsatqa jeteleıtin ıdeıany – Máńgilik El ıdeıasyn Qazaq Eliniń Ulttyq Ideıasy dep jarııalaýymen aıryqsha aıaýly, bólekshe baǵaly.
El – halyq sóziniń de, memleket sóziniń de, ult sóziniń de balamasy. «Adamzat tarıhynda óshpes iz qaldyryp ketken, Eýrazııa qurlyǵyndaǵy halyqtardyń taǵdyryna orasan áser etken» (N.Nazarbaev), zamanynda kóktiń júzin titiretken kók túrikteri el bolýdy halyq retinde qalyptasýdyń, memleket retinde myǵymdanýdyń, ult kúıinde uıysýdyń bıik belesi dep bilgen. Osynyń bárin birjolata bekitý úshin sol zamannyń ózinde basqa qonǵan baqyttyń baıandylyǵyn bildiretin fılosofııalyq kategorııa – Máńgilik El uǵymyn oılap tapqan. Sony tasqa qashap turyp, «MINGÝ EL» dep jazyp ketken. Ejelgi túrkilerden taraǵan barsha halyqqa birdeı túsinikti sózder. Musylmandyqqa bet burǵan aǵaıyndar turmaq, tarıhtyń talaıymen basqa dinderdi ustanatyn sahalar, tývalar, marııler de et júrekti eljiretetin El sózinen eki eli ajyramaı, óz elderin Saha El, El Tyva, Marıı El ataýmen keledi. Solardyń ishinde marııler Marıı El ataýyn resmı alyp ta úlgerdi. Demek, El – uly uǵym. Halyq bolyp quralý, memleket qura alý, derbes tura alý, ult bolýǵa bet bura alý – osynyń bári El bolýdyń belesteri. Táýbe, sol belesterdiń birinen birine abyroımen asyp kelemiz. «Máńgilik Eldiń irgetasyn qaladyq» – Nursultan Nazarbaevtyń Joldaýdaǵy osy sózi bul sapardyń uzaqqa sozylatynyn, bul joldyń alysqa baratynyn bildiredi. «Táýelsizdikke qol jetkizgennen góri ony ustap turý áldeqaıda qıyn. Bul – álem keńistiginde ǵumyr keshken talaı halyqtyń basynan ótken tarıhı shyndyq. О́zara alaýyzdyq pen jan-jaqqa tartqan berekesizdik talaı eldiń taǵdyryn qurdymǵa jibergen. Tirshilik tezine tótep bere almaı, jer betinen ult retinde joıylyp ketken elder qanshama» – Nursultan Nazarbaev bul sózderdi de Joldaýda aıtty. Eskertti bárimizge. «Máńgilik El bolý bizdiń óz qolymyzda. Bul úshin ózimizdi únemi qamshylap, udaıy alǵa umtylýymyz kerek» degendi de aıtty bizdiń Elbasymyz. Qaırady bárimizdi.
Máńgilik El bolý babalaryńnyń babalarynyń babalary armandaǵan, ańsaǵan asyl muratty balalaryńnyń balalarynyń balalary ardaq tutatyndaı memleket ornatý degendi, endi eshqashan, eshqashan bógdeniń bodandyǵyna túspeıtin, halyqtyǵyn, ulttyǵyn, eldigin, memlekettiligin árqashan, árqashan áspetteıtin, úlgili úrdisterin ústegen ústine ústeıtin, bar zamanda da uly men qyzynyń baǵy basynda turatyn, barsha halqynyń baqyty baıandy bolatyn el qurý degendi bildiredi. Alash gımnine: «Endi Alashty eshkimniń Qorlyǵyna bermeımiz, Alash týy astynda Kún sóngenshe sónbeımiz!» dep jazǵanda qaıran Sultanmahmut osyny oılaǵan. «Qazaqstan-2050» – Máńgilik Elge bastaıtyn eń abyroıly, eń mártebeli jol. Osy joldan aınymaıyq, qadirli halqym!» degende Elbasymyz da osyǵan shaqyrǵan.
Halqymyz Nursultan Nazarbaevty áý bastan-aq el baǵyna týǵan perzent dep sengen, eki tizgin, bir shylbyrdy qolyna bergen, adastyrmas azamatym dep sońynan ergen, sóıtip búgingi bıigine kelgen. Alda da solaı bola beredi. Qazaqtyń basyna baqyt qusy qona beredi.
Kún sóngenshe sónbeımiz!
Saýytbek ABDRAHMANOV
