Oqıǵa 16-tamyz kúni saǵat 19:15-te «Samara-Shymkent» avtojolynyń Yrǵyz aýdany Qalybaı kentiniń janynda tirkeldi. Shalqar aýdanynyń 39 jastaǵy turǵyny, «Nissan X-Trail» avtokóliginiń júrgizýshisi Qyrǵyzstan Respýblıkasynyń azamatynyń basqarýyndaǵy «Volvo FH460» júk kóligimen soqtyǵysty.
«Jol apaty saldarynan «Nissan X-Trail» avtokóliginiń júrgizýshisi, 40 jastaǵy jubaıy, 11 jastaǵy uly alǵan jaraqatynan oqıǵa ornynda kóz jumyp, 5 jasar uly men 10 jasar qyzy Yrǵyz aýdanynyń ortalyq aýrýhanasyna jatqyzyldy. Onda 5 jasar uly kóz jumdy.
QR QK 345-baby 4-bóligi, ıaǵnı, «Abaısyzda eki nemese odan da kóp adamnyń ólimine ákep soqqan jol erejesin buzý» boıynsha sotqa deıingi tergeý bastaldy», dedi Aqtóbe oblysy PD bastyǵy Atyǵaı Arystanov.
