О́tken apta sońynda medısınalyq mekemeler indettiń taralýyn toqtatyp, juqtyrýdyń aldyn alý baǵytyndaǵy daıarlyǵyn pysyqtaý úshin oblys ákimi Gúlshara Ábdiqalyqova jańadan ashylǵan modýldi juqpaly aýrýhanaǵa bardy. Koronavırýspen kúresip júrgen dárigerlermen pikirlesip, jansaqtaý bóliminde jatqan azamattardyń jaǵdaıyn bildi.
Úkimettiń qoldaýymen 200 tósek-orynǵa arnalǵan modýldik stasıonar ótken aptadan bastap naýqastardy qabyldaı bastady. Jańa emdeý mekemesinde naýqastarǵa qajetti dári-dármek tolyq jetkilikti, mamandardyń jumys rejimi jolǵa qoıylǵan.
Oblys ákimi em alýshylarmen áńgime barysynda sońǵy kúnderi vırýstyń jańa shtamdarynyń paıda bolýy sebepti indetten saqtaný amaldaryna jete mán berýdi, qorǵanýdyń tóte joly vaksına alýǵa shaqyrdy.
– Koronavırýspen kúreske oblystyq medısınalyq uıymdar tolyǵymen daıyn. Dári-dármek qory, medısınalyq qural-jabdyqtar jetkilikti. Biraq vırýstyń jańa shtamdary jyldam taralyp, túrli ózgeriske túsip jatqany bárimizdi alańdatyp otyr. Keshe ǵana AQSh-tyń Nıý-Iork qalasynda jańadan «Iota» shtamy bilindi. Osyǵan baılanysty vaksınalaý jumystaryn qarqyndy túrde kúsheıtýimiz kerek. Toı-jıyn men dástúrli sharalardan tyıylyp, dertti juqtyryp almaýdyń amalyn jasaýymyz kerek. Balalardyń qaýipsizdigi, jaqyndarymyzdyń saýlyǵy úshin oblys turǵyndaryn ekpe alýǵa shaqyramyn. Árbirimiz jaýapkershilikti sezinsek, qaı qıyndyqtyń da qursaýynan aman shyǵarymyzǵa senimdimin, – dedi oblys ákimi.
Aımaqta maýsym-shilde aılarynda ınfeksııalyq tósek-oryn sany 585-ten 2 340-qa deıin, al reanımasııalyq tósek-oryn 90-nan 172-ge deıin kóbeıtilip, qazir júkteme 55 paıyzdy qurap otyr. Rezervtik tósek-oryn sanyn qosqanda 3 200 tósek-oryn ázirlendi.
Oblys ákimi densaýlyq saqtaý basqarmasynyń basshysy Sábıt Pazylovqa vırýstyń taralý deńgeıin turaqty baqylaýǵa alyp, algorıtmge sáıkes qajetti sharalardy der kezinde qabyldaýdy tapsyrdy. Osy jumystarmen qatar, turǵyndardy vaksına alýǵa shaqyrý, indettiń taralýyn tek ekpe ǵana toqtatatynyn nasıhattaý bir sátke de báseńdemeýi kerektigin atap aıtty.
Qyzylorda
