Sońǵy aqparǵa qaraǵanda AQSh tamyzdyń 14-nen beri aýǵan jerinen dıplomattar, arnaıy qyzmet pen gýmanıtarllyq uıym ókilderi jáne jergilikti azamattardy qosa eseptegende 6 myńdaı adamdy kóshirgen. Al Ulybrıtanııa 2 myńnan asa azamatyn evakýasııalaǵan.
Fransııaǵa keıingi bir kúnde Aýǵanstannan 200, Ispanııaǵa 50 adam jetkizilgen. Kabýl áýejaıy arqyly óz azamattary men saıası baspana suraǵandardy kóshirý operasııasyn Avstralııa, Polsha, Nıderland syndy ózge de ondaǵan el júzege asyryp jatyr. Resmı London Aýǵanstannan 20 myń bosqyndy qabyldaýdy josparlap otyrǵanyn jáne ortaq iske 394 mıllıon dollar bóletinin jetkizdi. Al tálipter qozǵalysy halyqqa áýejaıǵa qaraı qashýdy toqtatyp, turǵyndardy úıge oralýǵa úndep jatyr.
