Balanyń 7 jasynda qarynshaaralyq qalqan aqaýlary anyqtalyp, onyń trıkýspıdalyq qaqpaqshasyn túzetken, biraq bul ota jıi kezdesetin asqynýlarǵa alyp keldi.
«Júrekte mundaı tosqaýyl turǵanda júreksheler men qarynshalar arasynda baılanys bolmaıdy. Bul júreksheler men qarynshalardyń bólek soǵýyna alyp keledi, áıtse de júrek sınhrondy túrde jumys isteýi tıis. Bundaı jaǵdaı adam úshin óte qaýipti jáne dereý emdeýdi qajet etedi. Solaı jasaldy da: otadan keıin naýqasqa elektrodtary bar ádettegi kardıostımýlıator (EKS) qoıyldy», deıdi Júrek ortalyǵynyń mamandary.
Alaıda, osy ýaqyt ishinde bala ósti, ıaǵnı ımplantasııalanǵan kardıostımýlıator mólsheri endi sáıkes kelmeıdi: elektrod sozyla bastaıdy.
«Rentgen sýrette ol doǵa tárizdi kórinedi, biraq qalypty jaǵdaıda elektrod tolqyndy bolýy kerek», dep túsindiredi mamandar.
Elektrodtyń jarylý qaýpi artady, sodan keıin júrek jumysyna qaıta tosqaýyl bolady.
«Biz eski kardıostımýlıatorlyq júıeni alyp tastaý kerek dep sheshtik, sebebi ol naýqasqa endi jaramaıdy. Osydan keıin jańa Micra AV elektrodsyz kardıostımýlıatoryn saldyq. Naýqastyń jaǵdaıy aıtarlyqtaı jaqsardy, al júreksheler men qarynshalar arasyndaǵy sınhronızasııa 80 paıyzǵa jetti», deıdi Júrek ortalyǵynyń ıntervensııalyq arıtmologııa bóliminiń meńgerýshisi Aıan Ábdirahmanov.
Micra AV – qos kameraly stımýlıasııa qyzmetin atqaratyn, bar bolǵany tabletkanyń ólshemindeı ǵana, álemdegi eń kishkentaı elektrodty kardıostımýlıator. Ol tek oń qarynshaǵa – júrektiń bir kamerasyna ornatylady. Biraq ol júreksheniń jıyrylýyn tanýyna qaraı eki kameraly sekildi jumys isteıdi.
