Qazaqstandyq endoskopııalyq hırýrgtar qaýymdastyǵynyń Prezıdenti, medısına ǵylymdarynyń doktory, professor, QR eńbek sińirgen qaıratker Vladımır Kotlobovskıı bastaǵan Ýkraına, Máskeý jáne Qazaqstan ǵalymdarynan quralǵan top 1 apta boıy Taraz qalalyq kópbeıindi, Jambyl oblystyq kópbeıindi, oblystyq kópbeıindi balalar aýrýhanasynda sheberlik synyptaryn ótkizip, kúrdeli otadan keıingi asqynýlardyń aldyn alý jáne olardy endoskopııalyq quraldardyń kómegimen emdeý jónindegi tájirıbelermen bólisip, eresekter men balalar arasyndaǵy qaýipsiz endohırýrgııa baǵytynda trenajerlar men sımýlıatorlarmen praktıkalyq sabaqtar ótkizdi.
Laparoskopııalyq operasııalardan keıin asqynýlar sany jáne aralasýdan keıingi eńbekke jaramsyzdyq kezeńiniń ortasha uzaqtyǵy dástúrli hırýrgııalyq emdeýmen salystyrǵanda 1-2 aıdan 3-7 kúnge deıin kúrt tómendeıdi. Ǵalymdardyń tájirıbesi men bilimi – Jambyl oblysynda endobeınehırýrgııanyń odan ári damýyna septigin tıgizetini sózsiz.
Konferensııa barysynda Jambyl oblystyq kópbeıindi aýrýhanasyna lazerli elektrohırýrgııalyq keshen satyp alý úshin 40 mıllıon teńgeniń sertıfıkaty tabys etildi.
