Batyr aýyldyq okrýginiń ákimi Saýyt Aıtbaevtyń aıtýynsha, qazir 15 myńǵa jýyq turǵyny bar aýylda jalǵyz dárigerlik ambýlatorııa qyzmet etedi. Al jergilikti halyq sany kún saıyn artyp keledi. Sondyqtan medısına nysany bul aýylǵa asa qajet.
«Eki birdeı densaýlyq saqtaý ǵımaratynyń qurylysynyń jýyrda qoldanysqa beriletini bizdiń aýyl turǵyndary úshin qýanyshty habar. Atalǵan ortalyqtar aýylymyzdyń «Astana» shaǵyn aýdanynda salynyp jatyr. Biriniń aýmaǵy 300 sharshy metr, ekinshisi 500 sharshy metrdi quraıdy. Bireýi 7000 turǵynǵa qyzmet kórsetse, kúnine 100-ge jýyq adamdy qabyldaı alady. Al ekinshi ortalyq 15 000 adamǵa medısınalyq qyzmet usyna alady, táýligine 300 ben 500 aralyǵyndaǵy azamatty qamtıdy. Qurylys jumysy aıaqtalsa, 100-ge jýyq maman jumyspen qamtylmaq», dedi aýyldyq okrýginiń ákimi Saýyt Aıtbaev.
Aıta keteıik, jańa nysandar qazan jáne qarasha aılarynda qoldanysqa beriledi dep josparlanyp otyr.
