Bul týraly reseılik ekonomıst Mıhaıl Delıagın málimdegen. Mysaly, «Komsomolskaıa pravda» radıosynyń sońǵy efırleriniń birinde ol vaksınasııalanǵan adamdardyń KVI juqtyrý múmkindigi ekpe saldyrmaǵandarǵa qaraǵanda 1.5 ese joǵary ekenin jetkizdi. Biraq bul málimdeme resmı statıstıkamen jáne ǵylymı derektermen rastalmaıdy.
Spýtnık V vaksınasynyń tıimdiligi dáleldenbegen degen tezıster de ǵylymı derekterge qaıshy keledi. Preparattyń klınıkalyq synaqtarynyń úshinshi kezeńiniń aralyq nátıjeleri aǵymdaǵy jyldyń aqpan aıynda medısınalyq resenzııalanǵan The Lancet jýrnalynda jarııalandy. Maqalada vaksınanyń tıimdi jáne qaýipsiz ekendigi aıtylǵan. Synaqqa qatysýshylarda aýtoımmýndyq aýrýlardyń damý jaǵdaılary týraly habarlanǵan joq.
Búgingi tańda Spýtnık V tirkelgen jáne 69 elde jappaı vaksınasııalaý úshin qoldanylyp jatyr. KVI qarsy egý naýqany bastalǵannan beri preparattyń qaýipsiz jáne tıimdi ekendigi týraly dálelder jetkilikti jınaldy. Bul týraly Nature jáne The conversation sııaqty bedeldi basylymdar habarlady.
Sondaı-aq, ǵalymdar Spýtnık V vırýstyń ártúrli nusqalaryna qarsy tıimdiligin anyqtaý úshin egilgen adamdardyń qanyn alyp zerttegen zertteýler bar. Delıagın aıtqan aýtoımmýndy antıdenelerdiń damýy týraly ǵylymı eńbekte aıtylmaǵan.
Sonymen qatar ǵalymdar KVI qarsy vaksınalardyń eshqaısysynyń, sonyń ishinde mRNQ men vektorlyq preparattardyń aýtoımmýndy aýrýlardyń damýy arasyndaǵy baılanysty tappady. Biraq COVID-19 aýyrǵan vaksınasııalanbaǵan adamdarda aýtoantıdenelerdiń bolýy týraly birden birneshe ǵalymdar toby habarlady.
Spýtnık V vaksınasynyń dáleldenbegen tıimdiligi men preparattyń aýtoımmýndy aýrýlardy týdyrýy týraly málimdemeler negizsiz jáne qoldanystaǵy ǵylymı málimetterge qaıshy keledi.
