Resmı aqparat boıynsha qazir óńirde qatty turmystyq qaldyqqa (QTQ) arnalǵan 130 oryn (jer aktileri bar) qarastyrylǵan, onyń ishinde tıisti ruqsaty bar 24 polıgon jumys istep tur.
Búginde Aqmola oblysynyń 10 aýdanynda zańdastyrylǵan polıgon áli kúnge deıin joq. Onyń saldary zańsyz qoqys tógetin oryndardyń kóbeıýine ákelip soǵýda. Máselen, bıyl ǵaryshtan júrgizilgen monıtorıngke sáıkes Arqa óńirinde 624 beıbereket qoqys oryndary anyqtalyp, 361 zańsyz polıgon joıyldy.
Budan bólek, óńirde óndiristik jáne turmystyq qaldyqtardy suryptap, qaıta óńdeýge arnalǵan ınfraqurylym qarastyrylmaǵan. Oblysta qatty turmystyq qaldyqty jınaýmen 4 kásiporyn aınalysady. Byltyr munda QTQ-tyń jalpy kólemi 243 myń tonnany qurasa, bıylǵy 6 aıda onyń kórsetkishi – 124 tyń tonna. Bul rette qaıta óńdeýdiń úlesi nebári 3%-dy ǵana quraıtynyn aıta ketken oryndy.
Osy ózekti máseleni sheshý úshin óńirdegi atqarýshy bılikke belgilengen tártipke saı QTQ-tyń barlyq polıgonyn rásimdeý jumysyn jandandyrýǵa, polıgondardy talapqa saı ornalastyrýǵa, sondaı-aq aýdandyq eldi mekenderde qaldyqty ýaqytsha saqtaý alańdaryn uıymdastyrýǵa jáne halyqty qaldyqtardy fraksııalar boıynsha suryptaýǵa yntalandyrý úshin qaıtalama shıkizatty satyp alý pýnktterin belgileýge keńes berildi.
Sonymen qatar zańsyz qoqys oryndaryn azaıtý úshin jergilikti polısııa qyzmetimen birlesip jumysty kúsheıtken durys deıdi ekologter.
Jaýapty vedomstvonyń málimetine sensek, qazir óńirde beıbereket qoqys úıindileri azaımaı tur. Jyl saıyn ótkiziletin sanıtarlyq abattandyrý sharalaryna qaramastan, tıisti baqylaýdyń álsizdigi men polıgondardaǵy kommýnaldyq qaldyqty retteý jolǵa qoıylmaǵan soń eldi mekender mańynda zańsyz qoqys oryndary qaptaı beredi.
